O‘zbekiston umumiy o‘rta ta'lim maktablari o‘quvchilarining qishki ta'tili kunlari ma'lum bo‘ldi. Bu haqda Xalq ta'limi vazirligi Matbuot xizmatidan xabar berildi.
Aniqlashimizcha, o‘quvchilarning qishki ta'til kunlari 2018 yilning 28 dekabr kuni boshlanib, 2019 yilning 10 yanvariga qadar davom etadi. 11 yanvar, juma kunidan e'tiboran uchinchi chorak boshlanadi.
Bu yil o‘quvchilarning qishki ta'tilni har qachongidan maroqli va zavqli o‘tkazishlari uchun alohida tayyorgarlik ko‘rilmoqda. Maktabdagi to‘garaklar, tadbirlardan tashqari, Xalq ta'limi vazirligi tomonidan ikkita yirik loyiha amalga oshirilmoqda. Bular: "Mening ilk ijod mahsulim” an'anaviy o‘quvchi-yoshlar media festivali va "A'lo ta'til: Qishki oromgoh” loyihasi.
"Mening ijod mahsulim” an'anaviy o‘quvchi-yoshlar media festivali Respublikadagi barcha umumta'lim maktablarining 8-11 sinflarida ta'lim olayotgan (14-18 yoshdagi) ijodkor o‘quvchi-yoshlarning ijodiy faoliyatini ommalashtirish, kasbiy mahoratini rivojlantirish, ularni qo‘llab-quvvatlash hamda rag‘batlantirish maqsadida tashkil etilmoqda.
Festivalning respublika bosqichi 5-6 yanvar kunlari "A'lo ta'til loyihasi: Qishki oromgoh” doirasida o‘tkaziladi.
Festivalda ishtirok etgan ishlardan har bir yo‘nalish bo‘yicha ikkitadan ijodiy ish nominatsiyalar bo‘yicha taqdirlanadi. Festivalda g‘olib bo‘lgan 6 nafar ishtirokchilar laureatlik sertifikati, statuetka va planshet bilan, nominatsiyalar bo‘yicha g‘olib deb topilgan yana 6 nafar ishtirokchilar maxsus diplom va esdalik sovg‘alari bilan taqdirlanadi.
"A'lo ta'til: Qishki oromgoh” loyihasi Surxondaryo viloyatining Termiz shahrida tashkil etilayotgan bo‘lib, u bir hafta davom etadi.
Lagerga respublikaning turli hududlaridan xalqaro olimpiadalar va sport musobaqalarida g‘olib bo‘lgan, qolaversa, iqtidorli, zukko va qobiliyatli 120 nafar o‘quvchi-yoshlar qamrab olinadi. Ular loyiha doirasida Surxondaryoning ko‘zga ko‘ringan va diqqatga sazovor bo‘lgan nuqtalarida ham bo‘lib, viloyatning turizm salohiyati bilan tanishadilar.