Teatr va kino aktyori Hamid Toshpo'latov 1957-yilning 20-iyunida Toshkentda tavallud topgan. Oilada o'n ikki farzandning biri bo'lgan ushbu aktyor, bolaligidan san'atga qiziqqan. U maktabda o'qib yurgan vaqtda Toshkentning eski shahar dahasida joylashgan teatrga qatnagan va o'sha yerda san'at sirlarini o'rgangan.
O'rta maktabni tamomlagach Toshkent Davlat pedogogika institutiga o'qishga kirgan. Ushbu oliygohning uchinchi kursiga kelib o'qishni to'xtatgan va 1977-yildan Toshkent davlat san'at va madaniyat oliygohida tahsil ola boshlagan.
Hamid Toshpo'latov kinoga Shuhrat Abbosov hamda Yo'ldosh A'zamov kabi taniqli rejissyorlarning filmlaridagi epizodik rollari bilan kirib kelgan.
Qahramonimiz teatrdagi faoliyatini Muqumiy nomidagi O'zbekiston davlat musiqali teatrida sahna ishchisi va rassom sifatida boshlagan. Keyinchalik O'zbekiston davlat drama teatrida, harbiy xizmatdan qaytgach esa Abdulqosim madrasasidagi sharq etnografik teatri hamda O'zbekiston davlat filarmoniyasida faoliyat yuritgan.
Aktyor ijodining ayni qizqin pallasida shaxsiy hayotida sodir bo'lgan noxushliklar sabab uzoq yillar san'atdan uzoqda bo'lgan hamda bir necha yil turli sohalarda ishlagan. Hamid Toshpo'latov 2006 yilga kelib yana san'at sohasiga qaytgan va O'zbek milliy akademik drama teatrida o'z ijodini davom ettirgan.
Ushbu aktyor bugungi tomoshabinlarga asosan Mehmonjonlardan aylanay serialidagi obrazi bilan yaxshi tanish bo'lib, bu serialdan tashqari hozirgacha, o'nlab spektakl hamda yigirmadan oshiq film va seriallarda ishtirok etgan.
Bugungi kunda 63 yoshda bo'lgan Hamid Toshpo'latovni besh qiz va ikki o'g'il farzandi hamda bir necha nabirasi bor.