Yodgora Ziyomuhammedova 1952-yilning 23-aprel sanasida Toshkent shahrida tavallud topgan. U oilada uch qizning eng kenjasi bo'lgan.
Qahramonizni bolalik chog'ida, qo'shnisi taniqli dublyaj aktrisasi Mukambar Rahimova, undagi iste'dodni payqab o'zi bilan dublyajga olib borgan. Yodgora Ziyomuhammedovaning san'at sohasidagi faoliyati aynan dublyajdan boshlangan.
Aktrisa maktabni tamomlagach Toshkent teatr va rassomchilik san'ati oliygohida tahsil olgan. Oliygohdagi o'qishni yakunlab 1974-yildan "Yosh tomoshabinlar teatrida" ish boshlagan. Yodgora Ziyomuhammedova ushbu teatr sahnasida, bolajonlar uchun mo'ljallangan ko'plab spektakllarda esada qolarli obrazlarni gavdalantirgan.
Ushbu aktrisa tomoshabinlarga asosan oqshom ertaklari ko'rsatuvidagi chiqishlari bilan yaxshi tanish bo'lib, ushbu ko'rsatuvda 20 yildan oshiq boshlovchi sifatida faoliyat yuritgan. Bulardan tashqari qahramonimiz o'nlab film va seriallarda suratga tushgan. Shuningdek u dublyaj sohasida yuzlab kino va multfilm qahramonlariga ham ovoz bergan.
Yodgora Ziyomuhammedova o'zining san'at sohasida uzoq yillik faoliyati orqali "O'zbekistonda xizmat ko'rsatgan artist" unvoni bilan taqdirlangan.
Aktrisaning shaxsiy hayoti haqida. Yodgora Ziyomuhammedova o'zining hamkasbi, yosh tomoshabinlar teatri aktyori Shuhrat Ziyomuhammedov bilan oila qurgan. Ular turmushlari davomida ikki qiz va bir o'g'il farzandli bo'lishgan.
Taqdir taqazosi bilan aktrisaning turmush o'rtog'i Shuhrat aka bundan bir necha yil oldin olamdan o'tgan.
Aktrisaning farzandlari ham san'at sohasi vakillari bo'lib, egizak qizlari Fotima va Zuhra Ziyomuhammedovlar "Tantana" bolalar guruhida rahbarlik qilishadi. Yolg'iz o'g'li Tohir Ziyomuhammedov esa Yoshlar telekanalida rejissyor sifatida faoliyat yuritadi.
Bugungi kunda 68 yoshdan oshgan Yodgora Ziyomuhammedova nafaqada bo'lishiga qaramasdan, haligacha san'at sohasidagi faoliyatini davom ettirib kelmoqda.