Hoshim Arslonov 1956 yilning 1-avgust sanasida Namangan viloyatining Chust shahrida tug'ilgan.
Ushbu aktyor bolaligidan sportning futbol turiga qiziqqan hamda 5 sinfdan to 9-sinfgacha sport maktabida o'qib, futbol bilan shug'ullangan. Keyinchalik oyog'idan olgan og'ir jarohat sabab, ushbu sport turi bilan shug'ullanishni to'xtatishga majbur bo'lgan.
Hoshim Arslonov maktabni tamomlagach, aktyorlikka bo'lgan qiziqishi bois Toshkent teatr va rassomchilik san'ati oliygohida tahsil olgan. 1977 yilda ushbu oliygohdagi o'qishni yakunlagan hamda shu yili O'zbek davlat drama teatrida faoliyatini boshlagan.
Aktyor bu teatrda 1977 yildan 2017 yilgacha 40 yil ishlagan. Teatrdagi faoliyati davomida ko'plab o'ziga hos obrazlarbi gavdalantirgan.
Hoshim Arslonov tomoshabinlarga asosan kino va dublaj sohalaridagi faoliyati bilan ko'proq tanilgan bo'lib, kinoda o'nlab turli harakterdagi rollarni ijro etgan va "Marg'iyona" "Alpomish" "Otamdan qolgan dalalar" hamda "Tutash taqdirlar" kabi 30 dan oshiq bizga tanish film va seriallarda suratga tushgan.
Aktyor dublyaj sohasida ham juda sermahsul ijod qilgan hamda faoliyati davomida yuzlab film va serial qahramonlariga o'zbek tilida ovoz bergan. Hoshim Arslonov o'sha bizga tanish Esmeralda seriali dublyajida Rudolfo, Adrian hamda Melisio kabi 14 ta obrazga ovoz bergan.
Hoshim Arslonov san'at sohasida o'zining ko'p yillik xizmatlari sabab "O'zbekistonda xizmat ko'rsatgan artist" unvoni hamda bir necha nufuzli mukofotlar bilan taqdirlangan.
Aktyorni shaxsiy hayotiga to'xtaladigan bo'lsak, Hoshim Arslonov Mavluda ismli ayol bilan oila qurgan. Ular hayotlari davomida uch o'g'il va bir qiz farzand hamda o'nga yaqin nabirali bo'lishgan. Bugungi kunda aktyorning o'gillaridan biri Bobur Arslonov otasining izidan borib, aktyor sifatida faoliyat yuritmoqda.