O‘zbekistonda xizmat ko‘rsatgan madaniyat xodimi, yozuvchi, shoira Tursunoy Sodiqova 73 yoshida olamdan o‘tdi. Bu haqda Facebook ijtimoiy tarmog‘idagi "Qozog‘iston o‘zbek adabiyoti” guruhi a'zosi Bahodir Ubaydullo o‘g‘li xabar qildi.
"Azizlar, xalqimiz bugun yana bir buyuk kishisidan ayrildi. Shoira, yozuvchi, O‘zbekistonda xizmat ko‘rsatgan madaniyat xodimi, hoji ona Tursunoy Sodiqova olamdan o‘tdilar. Yaratgan u kishini o‘z rahmatiga olsin, kamchilik-nuqsonlarini mag‘firat qilsin, yaxshi amallarini o‘zlariga hamroh aylasin!”, deyiladi xabarda.
Ma'lumot uchun, shiora, adiba, voiz Tursunoy Sodiqova 1944 yili Andijon shahrida tug‘ilgan. Dastlab Toshkent shahridagi 82-umumiy o‘rta ta'lim maktabida tahsil olgan. 1966 yili Toshkent Davlat universitetining filologiya fakultetini tamomlagan. 1996 – 1978 yillarda Andijon shahridagi 15-maktabda, 1978 – 1993 yillarda Andijon Tillar Pedagogika instituti va Andijon Davlat univesitetida dars bergan.
1991 – 1995 yillar davomida Andijon viloyat Xotin-qizlar qo‘mitasida rahbarlik qilgan.
1993 – 2003 yillarda Respublika Ma'naviyat va ma'rifat markazida bo‘lim mudirasi lavozimida ishlagan.
Shu kungacha Tursunoy Sodiqovaning "Izlay-izlay topganim”, "Mehr qolur”, "Hazrati ayol”, "O‘g‘lim, qizim, senga aytaman”, "Rizolik izlab”, "Yashash tilsimi”, "Atirgul isi”, "Ayolga qasida”, "Dildagi dur”, "Baxt qayerda?”, "Quyoshlarim, oylarim” kabi o‘nlab kitoblari chop etilgan.
2009 yilda Xitoyda uyg‘ur tiliga o‘girilgan saylanmasi nashr etilgan.
Tursunoy Sodiqova O‘zbekistonda xizmat ko‘rsatgan madaniyat xodimi faxriy unvoni, "Shuhrat” medali bilan taqdirlangan.
2 qiz va 1 o‘g‘ilning onasi, o‘nlab nabiralarning buvisi edi.
Fursatdan foydalanib, tahririyatimiz nomidan Tursunoy Sodiqovaning oila a'zolari va yaqinlariga ta'ziya bildiramiz.