Sony Pictures Entertainment kompaniyasiga uyushtirilgan xakerlik hujumi natijasida korporatsiyaning hali efirga chiqmagan filmlari internetda tarqalib ketishi bilan bog‘liq voqealar davom etmoqda. Endi ushbu kompaniya bilan hamkorlik qilgan Gollivud yulduzlarining shaxsiy ma’lumotlari ham internetda tarqalib ketgani ma’lum bo‘ldi, deb xabar bermoqda The Wall Street Journal. Jumladan, xakerlar hujumidan Silvestr Stallone, rejissyor Jad Apatou, avstraliyalik aktrisa Rebel Uilson aziyat chekkan. Qayd etilishicha, tarmoqqa yulduzlarning ijtimoiy himoya raqamlari chiqarilgan. Bundan tashqari, kompaniyaning jami 47 mingdan ortiq hozirgi va sobiq xodimlarining ijtimoiy himoya raqamlari internetda tarqalib ketgan. Axborot xavfsizligi bilan shug‘ullanuvchi Identity Finder kompaniyasi tomonidan Sony Pictures’ga tegishli 33 ming hujjat tahlili natijalariga ko‘ra tarmoqqa shuningdek korporatsiya xodimlarining maoshlari va uy manzillari haqidagi ma’lumotlar ham chiqarilgan.