O‘zbekistondagi mavjud laboratoriyalarda shu kunga qadar 78 906 ta namuna COVID-19 koronavirus infeksiyasiga tekshirildi. Bu haqda Sog‘liqni saqlash vazirligi huzuridagi Sanitariya-epidemiologik osoyishtalik agentligi direktori Bahrom Almatov ma’lum qildi.
Uning ta’kidlashicha, Sog‘liqni saqlash vazirligi huzurida tashkil qilingan Shtab tomonidan ushbu kasallikning epidemiologik surishtiruv ishlari elektron tizimi yaratilgan bo‘lib, qayd qilingan barcha holatlar elektron dasturga kiritib boriladi.
"Bemorlar bilan bog‘liq bo‘lgan holatlar, ushbu kasallik kimdan yuqqan, kimlarga yuqish xavfi bor, shularni o‘rganib, kasallik tarqalishining oldini olish bo‘yicha barcha tadbirlar amalga oshirilmoqda”, dedi Bahrom Almatov bugun, 10 aprel kuni AOKA shtabida o‘tkazilgan brifingda.
Rasmiy vakilning ma’lum qilishicha, elektron dasturda bemor qayd qilingan kundan boshlab, uning pasport ma’lumotlari, ish joyi, kasallik belgilari dastlab namoyon bo‘lgan kundan boshlab u bilan muloqotda bo‘lgan kishilar ro‘yxati shakllantiriladi.
"Oila a’zolari, faoliyati davomida hayot marshruti chizib chiqilib, kasallik yuqishi mumkin bo‘lgan fuqarolar aniqlash bo‘yicha tezkor choralar ko‘rilmoqda. Bunda bizga IIV, prokuratura organlari va boshqa xizmatlar yordam bermoqda”, dedi u.
Ma’lumot o‘rnida, bugungi kunda epidemik vaziyat noxush bo‘lgan hududlardan kelgan va bemorlar bilan muloqotda bo‘lgan 84 281 nafar fuqaro salomatligi ustidan tibbiy nazorat davom etmoqda. Ulardan 63 951 nafar fuqaro uy sharoitida, 21 780 nafar fuqaro 202 ta muassasada statsionar sharoitda karantinga olingan.