Главная » 2020 » Mart » 28 » Uxan shahridagi metro qatnovlari qisman ishga tushirildi

---

17:41 Uxan shahridagi metro qatnovlari qisman ishga tushirildi

Koronavirus pandemiyasining o‘chog‘i bo‘lgan Xitoyning Uxan shahri metropoliteni 28-martdan boshlab qisman o‘z ishini qayta boshladi, deb xabar beradi "RIA Novosti”. "28-mart soat 06:30 dan boshlab 1, 2, 3, 4, 6 va 7-raqamli yo‘nalishlar o‘z ishini qayta boshlaydi. Poyezdlar harakati ish kunlari soat 06:00 dan 23:00 ga qadar, dam olish kunlari esa 06:30 dan 23:00 ga qadar amalga oshiriladi”, — deyiladi xabarda. Ta’kidlanishicha, metroga tushgan har bir yo‘lovchida himoya niqoblari bo‘lishi, chiqish va boshqa liniyalarga o‘tishda "sog‘lig‘i to‘g‘risidagi kod”ni skanerdan o‘tkazishi kerak. Hozirda Uxanda metroning jami 9 ta liniyasi bo‘lib, ular 228 ta stansiyani o‘zida birlashtiradi. Qolgan liniyalar qachon ishga tushishi noma’lum. 23-martdan boshlab shahardagi barcha liniyalar bo‘ylab bo‘sh poyezdlar qatnovi yo‘lga qo‘yilgan edi. Bundan maqsad metro tizimini tekshirish va yuzaga kelgan nosozliklarni bartaraf etish bo‘lgan. Yangi turdagi COVID-19 koronavirusi dastlab Xitoyning Xubey provinsiyasidan tarqalgan. Infeksiya epidemiyaga aylanib, mamlakatdan tashqarida ham tarqala boshladi. Biroq hozirga kelib Xitoy kasallik bilan samarali kurashmoqda: kasallanganlarning 90 foizdan ortig‘i sog‘ayib ketdi, pandemiya o‘chog‘i bo‘lmish Uxan shahriga qo‘yilgan transport cheklovlari qachon olib tashlanishi ma’lum qilindi. 26-mart holatiga ko‘ra,  Xitoyda bir sutkada koronavirusga chalinish bilan bog‘liq 67 ta holat aniqlangan bo‘lib, ularning barchasi chetdan yuqtirilgan. Xitoy 28-martdan boshlab vizasi bor xorijliklarning mamlakatga kirishini to‘xtatib qo‘ydi. So‘nggi ma’lumotlarga ko‘ra, butun dunyo bo‘ylab 100 mingdan ortiq odam koronavirusdan davolanishga muvaffaq bo‘lgan.

1 2 3 4 5 Категория: Har-Hil | Просмотров:657 | Добавил: moderator | Теги: yangilik | Рейтинг: 0.0/0

Всего комментариев: 0