Главная » 2018 » Avgust » 15 » Shavkat Mirziyoyev: “Investitsion loyihalar qog‘ozda qolib ketyapti”

---

09:37 Shavkat Mirziyoyev: “Investitsion loyihalar qog‘ozda qolib ketyapti”

Avvalroq, O‘zbekiston Respublikasi Prezidenti Shavkat Miromonovich Mirziyoyev raisligida navbatdagi videoselektor yig‘ilishi o‘tkazishi haqidaa xabar bergan edik.   Bugun, 14 avgust kuni O‘zbekiston Respublikasi Prezidenti Shavkat Mirziyoyev mamlakat iqtisodiyotiga to‘g‘ridan-to‘g‘ri xorijiy investitsiyalarni jalb etish masalalariga bag‘ishlangan videoselektor yig‘ilishi o‘tkazdi. Bu haqda Prezident Matbuot xizmati xabar bermoqda.   Unda hukumat a'zolari, davlat organlari va xo‘jalik birlashmalari rahbarlari, Qoraqalpog‘iston Respublikasi Jo‘qorg‘i Kengesi Raisi, Toshkent shahri va viloyatlar hokimlari, O‘zbekistonning xorijdagi diplomatik vakolatxonalari rahbarlari ishtirok etgan.   Shu yil 19 iyulda qabul qilingan qarorga ko‘ra, to‘g‘ridan-to‘g‘ri xorijiy investitsiyalar ishtirokida umumiy qiymati 64 milliard dollar bo‘lgan 849 ta loyiha ro‘yxati shakllantirilgan. Davlati rahbari joriy yilda 5 milliard 800 million dollar miqdorida to‘g‘ridan-to‘g‘ri xorijiy investitsiyalar jalb qilinishi zarurligini alohida ta'kidlagan.   Bu borada tartib-intizom va samaradorlikni ta'minlash maqsadida joriy yilgi loyihalarni amalga oshirish uchun nafaqat investitsiyalar bo‘yicha davlat qo‘mitasi va tarmoq idoralari rahbarlari, balki Bosh vazir va uning o‘rinbosarlari, vazirlar, qo‘mita raislari hamda Prezident maslahatchilari shaxsan mas'ul etib biriktirilgan.   Masalan, O‘zbekiston Respublikasi Bosh vaziri barcha investitsiya loyihalariga umumiy rahbarlik qilish bilan birga 144 ta loyiha bo‘yicha, Bosh vazirning birinchi o‘rinbosari 18 ta loyiha bo‘yicha to‘g‘ridan-to‘g‘ri xorijiy investitsiyalar jalb etilishiga bosh-qosh bo‘ladi.   Videoselektorda qaysi rahbar qanday investitsiya loyihalariga mas'ul ekani, ularning qiymati va bajarilish muddatlari birma-bir muhokama qilingan. To‘g‘ridan-to‘g‘ri xorijiy sarmoyalarni jalb etish holati bo‘yicha mutasaddilarning hisobotlari eshitilgan.   Loyihalarni amalga oshirishga mas'ul har bir rahbar shu bo‘yicha jadval tayyorlab, har hafta hududga chiqishi, loyiha tashabbuskorlari bilan gaplashib, muammosi bo‘lsa, zudlik bilan hal etishi, loyihalarni doimiy ravishda monitoring qilib borishi zarurligi ta'kidlangan. Investitsiyalar bo‘yicha davlat qo‘mitasiga Axborot texnologiyalari va kommunikatsiyalarini rivojlantirish vazirligi bilan birgalikda loyihalar monitoringi bo‘yicha avtomatlashtirilgan tizimni joriy etish vazifasi qo‘yilgan.   "Agar loyihalarni amalga oshirish monitoringini avtomatlashtirilgan tizimga o‘tkazmas ekanmiz, bu boradagi muammolarni o‘z vaqtida aniqlay olmaymiz. Bu tizim to‘g‘ridan-to‘g‘ri xorijiy sarmoya kiritayotgan investorlarga amaliy qo‘maklashib, ularning ishini osonlashtirishi zarur” degan Shavkat Mirziyoyev.   YAqinda Jizzax viloyatida xalqaro investitsiya forumi va Tovar ishlab chiqaruvchilar milliy ko‘rgazmasini o‘tkazish rejalashtirilgan. Investitsiyalar bo‘yicha davlat qo‘mitasi, Tashqi ishlar vazirligi, Tashqi savdo vazirligi, Savdo-sanoat palatasi va Jizzax viloyati hokimligiga mazkur tadbirlarni yuqori saviyada tashkillashtirish, har bir soha, tarmoq va hudud bo‘yicha maxsus taqdimotlar tayyorlab, namoyish etish bo‘yicha topshiriqlar berilgan.   Yig‘ilishda mahalliy hokimliklar rahbarlarining xorijiy davlatlarga uyushtirgan xizmat safarlari natijalariga ham e'tibor qaratilgan.   Avval berilgan topshiriqqa muvofiq, Ishchi guruh tomonidan bu boradagi ishlar o‘rganilgani, xususan, Farg‘ona, Andijon, Namangan, Xorazm viloyatlari va Qoraqalpog‘iston Respublikasida bir qator muammolar aniqlangani qayd etilgan. Ushbu hududlarda farmatsevtika, elektrotexnika va mashinasozlik sohasida keng imkoniyatlar bo‘lsa-da, asosan qurilish materiallari va to‘qimachilik mahsulotlari ishlab chiqarish, meva-sabzavotlarni qayta ishlash loyihalari bilan cheklanib qolingani tanqid qilingan. YUqori texnologik tarmoqlarga asoslangan loyihalar esa umuman yo‘q ekani ta'kidlangan.   Ko‘pchilik delegatsiya a'zolarining maqsadli dasturi bo‘lmagani, chet elliklarga hududning iqtisodiy salohiyati bo‘yicha aniq ma'lumotlar bermagani, ayrim kelishuvlar qog‘ozda qolib ketayotgani ko‘rsatib o‘tilgan.   Masalan, joriy yilning mart oyida Belgiyaga borgan Namangan viloyati delegatsiyasi Norin tumanida 200 bosh qoramolga mo‘ljallangan chorvachilik kompleksini tashkil etish bo‘yicha 3 million dollarlik loyiha kelishuvini imzolagan. Biroq, oradan 5 oy o‘tganiga qaramasdan uni amalga oshirish bo‘yicha amaliy ish boshlanmagan.   Qator delegatsiyalar xizmat safari davomida shartnomalarning quruq soni ortidan quvayotgani, oqibatda ushbu bitimlar natijador bo‘lmay, o‘ta mavhum, madaniy-gumanitar xarakterga ega bo‘lib qolayotgani qayd etilgan.   Shu bois Investitsiyalar bo‘yicha davlat qo‘mitasi va Tashqi ishlar vazirligiga mahalliy delegatsiyalarning xorijiy mamlakatlarga xizmat safarlari oldidan tashrifning maqsadi, taklif etilayotgan loyihalar va kutilayotgan amaliy natijalar bo‘yicha taqdimot o‘tkazish tartibini joriy etish zarurligi ta'kidlangan. Xizmat safarida erishilgan kelishuvlar bo‘yicha "yo‘l xaritalari” va tarmoq jadvallari ishlab chiqish hamda qat'iy ijro etish bo‘yicha topshiriqlar berilgan.

1 2 3 4 5 Категория: Har-Hil | Просмотров:1180 | Добавил: Admin | Теги: Shavkat Mirziyoyev: “Investitsion l | Рейтинг: 0.0/0

Всего комментариев: 0