Rossiya Federatsiyasida shu mamlakat haydovchilik guvohnomasiga ega bo‘lmagan odamlarga kirakashlik bilan shug‘ullanish taqiqlanishi mumkin. ushbu taqiqni nazarda tutuvchi qonun loyihasi Davlat Dumasiga kiritilgan.
Mazkur tashabbus muallifi Byudjet va moliyaviy bozorlar bo‘yicha Federatsiya Kengashi a'zosi Ahmat Salpagarov bo‘ldi.
Loyihada ta'kidlanishicha, bugungi kunda Moskvada 30-40 foiz taksi haydovchilarda xorijiy davlat haydovchilik guvohnomalari mavjud. Ular asosan O‘zbekiston, Tojikiston, Qirg‘iziston va Belarus fuqarolaridir.
Qayd etilishicha, xorijiy davlat haydovchilik guvohnomasiga ega haydovchilar ishtirokidagi yo‘l-transport hodisalari RF haydovchilik guvohnomasi bor haydovchilar ishtirokidagi YTHlarga qaraganda ancha ko‘p. RF IIV ma'lumotiga ko‘ra, joriy yilning o‘tgan sakkiz oyi davomida chet davlat haydovchilik guvohnomasi bor haydovchilar ishtirokida 5040 ta YTH sodir bo‘lgan.
Shu sababdan "Yo‘l harakati xavfsizligi to‘g‘risida”gi Federal qonunga o‘zgartirish kiritish taklif qilingan. Taqiq har qanday xorijiy davlat yoki xalqaro haydovchilik guvohnomasi bilan avtomobil boshqarishni cheklaydi.
Shuningdek, xorijiy milliy haydovchilik guvohnomalarini RF haydovchilik guvohnomalariga o‘zgartirishdagi o‘tish davrini olti oy qilib belgilash taklif qilingan.
Ma'lumot uchun, bugungi kunda ko‘plab o‘zbekistonliklar Rossiyaga mashinada odam tashib, yoki to‘g‘ridan-to‘g‘ri Rossiyada kirakashlik qilib tirikchilik qilyapti. Agarda mazkur qonun amaliyotga joriy qilinsa, ko‘plab odamlarning daromad manbai to‘xtab qoladi. Ular pul to‘lab, RF guvohnomasini olish uchun olti oy sarflashlari kerak bo‘ladi.