Главная » 2018 » Iyul » 1 » Qaysi kasb egalarining saratonga chalinish xavfi ko‘proq ekani aniqlandi

---

21:29 Qaysi kasb egalarining saratonga chalinish xavfi ko‘proq ekani aniqlandi

Boshqa soha kishilariga nisbatan bortkuzatuvchilarning saraton kasaliga chalinish xavfi ko‘proqdir. Garvard universtiteti qoshidagi jamoatchilik salomatligi maktabi mutaxassislari shunday xulosaga kelgan, deb yozmoqda "RIA Novosti”. Tadqiqot natijalari Environmental Health jurnalida chop etilgan. Olimlar 5 mingdan ortiq bortkuzatuvchilar hamda bir xil moliyaviy sharoitga ega 3 mingga yaqin erkak va ayollarning salomatligini taqqosladi. Ma’lum bo‘lishicha, ko‘krak, bachadon, oshqozon-ichak trakti, qalqonsimon bez saratoni singari kasalliklarga samolyot ekipaji xodimlari ko‘proq moyil bo‘ladi. Masalan, bortkuzatuvchilar orasida ko‘krak bezi saratoni bilan kasallanish holatlari 3,4 foizni tashkil qilgan. Taqqoslash uchun tanlangan guruhda esa bu ko‘rsatkich 2,3 foizga tengligi aniqlangan. Ko‘p bolali yoki farzand ko‘rmagan styuardessalarning ish staji ko‘paygani sari ko‘krak bezi saratoniga chalinish xavfi ham ortib boraveradi. Jamoatchilik salomatligi markazi tadqiqot natijalariga izoh bergan. Aytilishicha, bu holat bortkuzatuvchilar ishining o‘ziga xosligi bilan bog‘liq. Xususan, ular katta balandlikka ko‘tarilganda ionli nurlanish bilan to‘qnashadi. Tadqiqot mualliflari AQShda samolyot ekipaji xodimlarining saratonga chalinish xavfi Yevropadagidan katta ekanini ma’lum qilgan. "Yevropa Ittifoqida ekipajning nurlanish darajasi doimiy kuzatib boriladi va ish grafiklari ham shunga tayanib tuziladi. AQShda esa bunday tajriba yo‘lga qo‘yilmagan”, — deya tadqiqot mualliflaridan biri Irina Mordyukovich Business Insider nashriga intervyu bergan. Uning so‘zlariga qaraganda, bortkuzatuvchilar ehtiyot choralarini ko‘rsa, saratonga chalinish xavfini kamaytirishi mumkin. Masalan, maxsus kremlar yordamida ultrafiolet nurlaridan himoyalanish, shuningdek, dam olish kunlari to‘yib uxlash, sog‘lom ovqatlanish va sport bilan shug‘ullanish muhim.

1 2 3 4 5 Категория: Har-Hil | Просмотров:1220 | Добавил: Moderator | Рейтинг: 0.0/0

Всего комментариев: 0