Toshkentda 22-martdan avtobus, metro va "marshrutka”lar harakati to‘xtatildi. Bunday vaqtlarda avtomobil ko‘pchilikning yagona harakatlanish vositasiga aylanib qoladi. Biroq shunga qaramay ayrim ehtiyot choralariga rioya qilish kerak. CARtaUA avtomobil loyihasi haydovchilar uchun virusdan himoyalanishda yordam beradigan maslahatlari bilan bo‘lishdi, deb yozadi "Korrespondent.net”.
Ekspertlar birinchi navbatda avtomobilning eshik tutqichlariga e’tibor qaratish lozimligini ta’kidlaydi. Ko‘p hollarda undan boshqa insonlar ham foydalanadi. Uni antiseptik vositalar bilan yaxshilab artib turish kereak. Mashinaga o‘tirishdan oldin quyidagi algoritmga rioya qilish tavsiya etiladi:
Eshikni ochish;
Eshik tutqichini ushlagan qo‘lni antiseptik vositalar bilan dezinfeksiyalash;
O‘tirib olish va shundan keyingina boshqa predmetlarga teginish.
Bu kabi qoidalarga nafaqat haydovchi, balki yo‘lovchilar ham rioya qilishi kerak.
Shuningdek, ekspertlar Jahon sog‘liqni saqlash tashiloti hamda AQSh kasalliklar nazorati markazining tavsiyalarida koronavirusdan himoyalanish uchun keltirilgan tavsiyalarga diqqatli bo‘lishga chaqiradi. Virusni o‘ldiradigan vositalar:
Suv va sovun;
Maishiy oqartiruvchi vositalar;
Tarkibida 70 foizdan ortiq spirt bo‘lgan suyuqliklar.
"Avtomobil salonida oqartiruvchi vositalardan foydalanmaslik kerak - ular har qanday materialni chiritib yuborishi va plastiklarga zarar yetkazishi mumkin. Sovun eritmasi bilan o‘rindiqlar yoki charm salonni artsa bo‘ladi, biroq materiallar yaxshilab qurib olishi uchun bu ishni kechasi qilgan ma’qul. Spirtli antiseptik vositalar bilan salonning barcha plastik detallarini artish mumkin”, - deyiladi xabarda.