Avval xabar berganimizdek, O‘zbekiston Respublikasining turizm sohasini jadal rivojlantirishni ta'minlash chora-tadbirlari to‘g‘risida O‘zbekiston Respublikasi Prezidentining farmoni imzolandi.
Farmonda "O‘zbekturizm” Milliy kompaniyasi tugatilishi va uning negizida O‘zbekiston Respublikasi Turizmni rivojlantirish davlat qo‘mitasi tashkil etilishi belgilangan.
Mazkur qo‘mita turizm sohasidagi vakolatli davlat organi etib belgilanadi.
O‘zbekiston Respublikasi Turizmni rivojlantirish davlat qo‘mitasi zimmasiga turizm turoperatorlik faoliyatini litsenziyalash, O‘zbekiston Respublikasi sertifikatlashtirish bo‘yicha milliy organi – "O‘zstandart” agentligi bilan mustahkam o‘zaro hamkorlikda turizm faoliyati sub'yektlari tomonidan ko‘rsatiladigan turoperatorlik xizmatlari va mehmonxona xizmatlarini majburiy sertifikatlash, shu jumladan turli tashkiliy-huquqiy shakllardagi mehmonxonalarning tasnifini belgilash kiradi.
Shuningdek, qo‘mitaga sertifikatlanadigan turizm xizmatlarining normativ hujjatlarda belgilangan majburiy talablar va standartlarga muvofiqligi bo‘yicha inspeksiya nazoratini amalga oshirish yuklanadi.
O‘zbekiston Respublikasi Turizmni rivojlantirish davlat qo‘mitasining o‘z vakolatlari doirasida qabul qilgan qarorlari davlat va xo‘jalik boshqaruvi organlari, davlat hokimiyati va mahalliy boshqaruv organlari, mulkchilik shakllari va idoraviy bo‘ysunishidan qat'i nazar, xo‘jalik yurituvchi sub'yektlar tomonidan bajarilishi majburiy hisoblanadi.
Bir hafta muddatda O‘zbekiston Respublikasi Vazirlar Mahkamasi tomonidan O‘zbekiston Respublikasi Turizmni rivojlantirish davlat qo‘mitasi faoliyatini tashkil etish to‘g‘risida qaror qabul qilishi yuklatildi.