O‘zbekistonda aholining yuz niqoblariga bo‘lgan ehtiyojini qoplash maqsadida ishlab chiqarish quvvatlari kuchaytirildi, yangi sexlar ochilmoqda va tikuv korxonalari jarayonga qo‘shilmoqda. Bu haqda Farmatsevtika tarmog‘ini rivojlantirish agentligida tibbiy buyumlar va gigiyenik vositalar ishlab chiqaruvchi korxonalar rahbarlari, tekstil sanoati vakillari va distribyutorlar bilan 18-mart, chorshanba kuni, o‘tkazilgan kengaytirilgan yig‘ilishda ma’lum qilindi.
Farmatsevtika tarmog‘ini rivojlantirish agentligi direktori Sardor Kariyev himoya niqoblarini ishlab chiqarayotgan korxonalar hajmni ko‘paytirishi uchun ishlab chiqarishni yanada kuchaytirish bilan birga ularning sifatiga e’tibor qaratishlari zarurligini ta’kidladi.
Aholining himoya niqoblariga bo‘lgan ehtiyojini qondirish maqsadida yig‘ilishda ishtirok etgan tibbiy buyumlar ishlab chiqaruvchi korxonalar rahbarlari, tekstil sanoati vakillari va distribyutorlar o‘zaro hamkorlikda ish olib borishga kelishib oldi.
Mavzuga doir: O‘zbekistonda kuniga 500 ming dona tibbiy niqob ishlab chiqarilmoqda, ularning sonini 2 milliontaga yetkazish mumkin
Qayd etilishicha, "O‘ztekstilsanoat” uyushmasiga a’zo korxonalar uch turdagi himoya niqoblarining ishlab chiqarilishini kuniga 2 million donaga yetkazmoqda. SSV buyrug‘iga binoan, tibbiyot niqoblari tibbiy buyumlar ro‘yxatiga kiritilgan edi. Hozirda tibbiyot niqoblarini ushbu ro‘yxatdan chiqarish bo‘yicha mazkur buyruqqa o‘zgartirish kiritilmoqda. Undan maqsad — himoya niqoblarini ishlab chiqarish jarayonini soddalashtirish va ishlab chiqarishni yanada oshirishdir.
Ma’lumot uchun, O‘zbekistonda tibbiy buyumlar, aynan tibbiyot va gigiyenik yuz niqoblarini ishlab chiqaruvchi 20 ta korxona mavjud. Shuningdek, respirator ishlab chiqaruvchi korxonalar ham bor bo‘lib, ularning barchasida ishlab chiqarish quvvati kuchaytirilgan va ular uzluksiz tartibda ishlab turibdi. Bundan tashqari, ishlab chiqarishga qo‘shimcha ravishda O‘zbekistonda tekstil korxonalari ham dokadan qatlamli gigiyenik niqoblarni ishlab chiqarishni yo‘lga qo‘ygan.