Главная » 2022 » Dekabr » 29 » O‘zbekistonda so‘nggi ikki yilda 5 mingga yaqin mansabdor korrupsiyada ayblanib, javobgarlikka tortildi

---

21:49 O‘zbekistonda so‘nggi ikki yilda 5 mingga yaqin mansabdor korrupsiyada ayblanib, javobgarlikka tortildi

O‘zbekistonda 2021—2022-yillarda besh mingga yaqin mansabdor shaxs korrupsiya jinoyati bo‘yicha ayblanib, javobgarlikka tortildi. Ma’lum bo‘lishicha, O‘zbekistonning korrupsiyaga qarshi xalqaro reytinglardagi ko‘rsatkichlari nihoyatda past. Xususan, Transparency International korrupsiya bo‘yicha indeksda mamlakat 140-o‘rinda turibdi. Bu borada Shavkat Mirziyoyev ham alohida to‘xtalib kelmoqda. Jumladan, prezident 20-dekabr kungi Oliy Majlis va O‘zbekiston xalqiga murojaatnomasida korrupsiya muammosiga alohida to‘xtalib, uning oqibatlari bilan emas, balki sabablari bilan kurashishga e’tibor qaratdi. "Xalq bizdan yangi maktablar, bolalar bog‘chalari va kasalxonalar qurishni, ta’lim va tibbiyot sifatini oshirishni, ichimlik suvi va elektr energiyasi, yo‘l va transport bilan bog‘liq mahalliy muammolarni hal etishni, ish o‘rinlari sonini ko‘paytirishni, yangi tadbirkorlik imkoniyatlarini yaratishni, adolatni ta’minlashni kutmoqda”, — dedi davlat rahbari. Hozirda O‘zbekistonda keng jamoatchilik ishtirokida korrupsiyaga qarshi murosasiz muhit yaratilmoqda. Xususan, jismoniy va yuridik shaxslarning murojaatlarini ko‘rib chiqish tizimi tubdan takomillashtirildi, Prezidentning Xalq va virtual qabulxonalari, ishonch telefoni, shuningdek, vazirlik va idoralarning tegishli operatorlari tashkil etildi. 2022-yilda "Davlat xizmati to‘g‘risida”gi qonun va davlat xizmatchilarining axloqiy xulq-atvorining namunaviy qoidalari qabul qilinib, korrupsiyaga qarshi taqiq va cheklovlar belgilandi. Prezident murojaatnomasida davlat organlari rahbarlarining siyosiy-huquqiy javobgarligi institutini joriy etishni ham taklif etgan. Shuningdek, hukumat qarorlari, mamlakat hayotiga taalluqli ijtimoiy-iqtisodiy masalalar bo‘yicha muhim qarorlar qabul qilish kollegial tarzda, bevosita vazirlar ishtirokida amalga oshirilishi taklif qilinmoqda. Deputatlar, senatorlar, mahalliy kengashlarga aniq yo‘nalishlar bo‘yicha tahlil o‘tkazish, korrupsiyaga barham berishda faollik ko‘rsatish topshirilgan.

1 2 3 4 5 Категория: Har-Hil | Просмотров:198 | Добавил: moderator | Теги: yangilik | Рейтинг: 0.0/0

Всего комментариев: 0