Главная » 2022 » Yanvar » 12 » O‘zbekistonda karantin ostidagi mahsulotlarni olib kirish va olib chiqish qoidalarini buzganlik uchun javobgarlik belgilandi

---

13:32 O‘zbekistonda karantin ostidagi mahsulotlarni olib kirish va olib chiqish qoidalarini buzganlik uchun javobgarlik belgilandi

"O‘simliklar karantini va himoyasi tizimi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun prezident tomonidan imzolandi, deb xabar beradi Telegram’dagi "Huquqiy axborot” kanali. Qonun bilan Ma’muriy javobgarlik to‘g‘risidagi kodeksga quyidagi o‘zgartirishlar kiritilgan: o‘simliklar karantini obyektlariga va boshqa zararli organizmlarga qarshi kurashishga doir fitosanitariya talablarini hamda boshqa qoidalarni karantin ostidagi mahsulotlarni ishlab chiqarish, tayyorlash, saqlash, tashish, qayta ishlash, realizatsiya qilish va yo‘q qilish chog‘ida buzish – fuqarolarga BHMning 3 baravarigacha (810 ming so‘mgacha), mansabdor shaxslarga 5 baravarigacha (1 million 350 ming so‘mgacha); karantin ostidagi mahsulotlarni O‘zbekistonga olib kirish va olib chiqish qoidalarini buzish – fuqarolarga BHMning 5 baravarigacha (1 million 350 ming so‘mgacha), mansabdor shaxslarga 10 baravarigacha (2 million 700 ming so‘mgacha) miqdorda jarima solishga sabab bo‘ladi. Shuningdek, "O‘simliklar karantini to‘g‘risida”gi qonunga o‘zgartirishlar kiritilgan. Unga ko‘ra, fitosanitariyaga oid yuqori xavfga ega bo‘lgan karantin ostidagi mahsulotni, shu jumladan, ekish, payvandlash, ko‘paytirish uchun mo‘ljallangan ekish materiallarini xorijiy mamlakatlardan O‘zbekistonda yashovchi fuqarolarga pochta va kuryerlik jo‘natmalarida yuborish, shu jumladan, bagajda va qo‘l yukida olib o‘tish taqiqlanadi. Qonun rasmiy e’lon qilingan kundan e’tiboran 3 oy o‘tgach kuchga kiradi. Avvalroq O‘zbekistonda tarkibida xavfli zararkunandalar aniqlangani sababli 775 tonna kartoshka yo‘q qilingandi. Bunga Eron va Pokistondan olib kirilayotgan kartoshkalarda karantin ahamiyatiga ega o‘ta xavfli zararli organizmlar — oltinrang va nimrang nematodalar bilan zararlanish holatlari tizimli ravishda aniqlanayotgani sabab bo‘lgan.

1 2 3 4 5 Категория: Har-Hil | Просмотров:342 | Добавил: moderator | Теги: yangilik | Рейтинг: 0.0/0

Всего комментариев: 0