Avvalroq, aktrisa Shahzoda Muhammedovaning O‘zbekiston Respublikasi san'at arbobi, O‘zbekiston davlat konservatoriyasi professori Dilorom Omonullayevani haqorat qilgani bilan bog‘liq mashmasha "O‘zbekiston” teleradiokanali jurnalistlari Nozima Vohidova va Nilufar Umrzoqovaning "Uchburchak” nomli tok-shousida bugun, 20 iyul kuni soat 20:05 da muhokama qilinishi haqida xabar bergan edik.
Lekin negadir TV-dasturlar ketma-ketligidan joy olgan "Uchburchak" ko‘rsatuvi "yo‘q" bo‘lib, o‘rniga hali "navbati" kelmagan "Ob'yektiv nigohida" ko‘rsatuvi efirga uzatildi. Shahzoda Muhamedova va Dilorom Omonullayeva mojarosi haqidagi ko‘rsatuv nega olinganini hatto "Uchburchak" ko‘rsatuvining mualliflari ham bilolmay halak.
Mazkur xabarimizdan keyin ijtimoiy tarmoqlardagi sahifalarimizda turli muhokamalar, e'tirozlar kuchaydi. Tahririyatimiz telefonlari tinmadi. Ushbu mojaro televideniye orqali o‘z yechimini topishini kutgan odamlar ham yo‘q emasdi. Shu ketish bo‘lsa, "O‘zbekiston" telekanaliga bo‘lgan ishonch yana yo‘qolishi mumkin.
"O‘zbekiston" telekanali mazkur ko‘rsatuvni efirga berish haqida bong urib, endi lafzsiz chiqdi. Yoki Shahzoda Muhamedova ko‘rsatuvni efirdan oldirib tashlashga qodirmi? Yoinki televideniye mutasaddilarining jur'atlari yetmadimi?
Katta ehtimolga ko‘ra, ko‘rsatuv ertaga, 21 iyul kuni efirga uzatilishi mumkin. Lekin buni hech kim aniq bilmaydi. Hatto ko‘rsatuv ijodkorlari Nozima Vohidova va Nilufar Umrzoqova ham.
Eslatib o‘tamiz, aktrisa Shahzoda Muhammedova O‘zbekiston Respublikasi san'at arbobi, O‘zbekiston davlat konservatoriyasi professori, bastakor Dilorom Omonullayevani yoshlarga qo‘pol munosabatda ayblab, haqorat qilgan edi. Muhammedova o‘z iddaolarida Omonullayevani razil inson, ruhiy kasal deb, pora olishiga sha'ma qildi.