Prezidentning "O‘zbekiston Respublikasi fuqaroligiga oid masalalarni ko‘rib chiqish tartibini belgilash to‘g‘risida”gi farmoni loyihasi e’lon qilindi.
Qayd etilishicha, "O‘zbekiston Respublikasining fuqaroligi to‘g‘risida” yangi tahrirdagi qonuniga muvofiq, shuningdek, O‘zbekiston Respublikasi fuqaroligiga oid masalalarni ko‘rib chiqish tartibini belgilash maqsadida O‘zbekiston Respublikasining fuqaroligi bilan bog‘liq masalalarni ko‘rib chiqish tartibi to‘g‘risidagi nizom hamda Prezidenti huzuridagi Fuqarolik masalalari komissiyasi to‘g‘risidagi nizom tasdiqlanadi.
Shuningdek, Ichki ishlar vazirligi migratsiya va fuqarolikni rasmiylashtirish bo‘linmalariga qo‘shimcha 16 ta shtat birliklari ajratiladi.
O‘zbekiston Respublikasining fuqaroligi masalalarini ko‘rib chiqish tartibi to‘g‘risidagi nizomga ko‘ra, O‘zbekiston Respublikasining fuqaroligi masalalari yuzasidan ariza va iltimosnomalar:
O‘zbekistonda doimiy yashovchi shaxs tomonidan – hududiy ichki ishlar organiga;
O‘zbekistondan tashqarida yashovchi shaxs tomonidan – O‘zbekistonning xorijdagi diplomatik vakolatxonalarining konsullik bo‘limlari yoki onsullik muassasalariga topshiriladi.
O‘zbekiston Respublikasining fuqaroligiga soddalashtirilgan tartibda qabul qilish haqidagi iltimosnoma shaxsning O‘zbekistonda vaqtincha qayddan o‘tgan hududiy ichki ishlar organiga topshirilishi mumkin.
O‘zbekiston Respublikasi fuqaroligiga qabul qilish, tiklash va undan chiqish haqidagi iltimosnoma hamda O‘zbekiston fuqaroligiga tan olish haqida ariza 2 nusxada to‘ldiriladi. Ariza yoki iltimosnomaga ilova qilinayotgan hujjatlar ham 2 nusxada taqdim etiladi, ularning bir nusxasi hududiy ichki ishlar organida hujjat qabul qilingan vaqtdan boshlab yo‘q qilingunga qadar saqlanadi.
Ariza beruvchi tomonidan tug‘ilganlik to‘g‘risidagi guvohnoma, pasport va (yoki) yashash guvohnomasi, nikoh tuzilganligi yoki nikoh bekor qilinganligi to‘g‘risidagi guvohnomalarning nusxasi taqdim etiladi. Mas’ul xodim tomonidan ushbu hujjatlarning nusxalari asli bilan solishtirilib ichki ishlar organi yoki konsullik muassasasining muhri bilan tasdiqlanadi, hujjatlarning asli ariza beruvchiga qaytarib beriladi.
Ariza yoki iltimosnomaga ilova qilinayotgan hujjatlar, o‘rnatilgan tartibda rasmiylashtirilib, ariza beruvchi tomonidan taqdim etilgan paytdan e’tiboran ko‘rib chiqish uchun qabul qilingan deb hisoblanadi. Uzrli sabablar mavjud bo‘lganda notarial tartibda tasdiqlangan ariza ishonchli shaxslar orqali berilishi mumkin.
Ariza yoki iltimosnomaga ilova qilinayotgan hujjatlar o‘rnatilgan tartibda rasmiylashtirilmaganligi, ariza beruvchi tomonidan shak-shubhasiz yolg‘on ma’lumot, haqiqiy bo‘lmagan va soxta hujjatlar taqdim etilishi, ariza va iltimosnomalarni qabul qilmaslik uchun asos hisoblanadi.
Ariza beruvchi tomonidan soxta hujjatlar taqdim qilganligi holati aniqlanganida qonuniy qaror qabul qilish uchun tergov organiga yuboriladi.