O‘zbekiston Respublikasining aholi soni 2017 yil 1 yanvar holatiga ko‘ra, 32 million 121 ming nafardan ortiqni tashkil etmoqda. Bu esa avvalgi ko‘rsatkichga nisbatan 1,7 foizga yoki 545,8 ming kishiga o‘sganini ko‘rsatadi. Bu haqda O‘zbekiston Respublikasi Davlat statistika qo‘mitasining Matbuot xizmati xabar bermoqda.
Jami aholining 50,6 foizi, ya'ni 16 million 238 mingdan ortiq kishi shahar, 49,4 foizi, ya'ni 15 million 882 mingdan ziyod kishi qishloq aholisi hisoblanadi.
2016 yilda tug‘ilish ko‘rsatkichi undan avvalgi yilga nisbatan past darajada bo‘lib, yanvar-dekabr oylarida 726,8 ming nafar bola dunyoga kelgan. Jumladan, Qoraqalpog‘iston Respublikasi, Surxondaryo, Buxoro, Toshkent, Andijon, Qashqadaryo, Sirdaryo viloyatlarida tug‘ilish koeffitsiyenti past darajada bo‘lgani aytilmoqda.
Bu statistikaning aksi, ya'ni tug‘ilish koeffitsiyenti yuqori bo‘lgan hududlar Toshkent shahri va Navoiy viloyati bo‘ldi.
Navoiy, Surxondaryo, Sirdaryo, Qashqadaryo, Xorazm viloyatlari va Qoraqalpog‘iston Respublikasida o‘lim koeffitsiyenti ko‘tarilganligi qayd etilgan. Andijon, Namangan, Toshkent, Farg‘ona viloyatlari va Toshkent shahrida esa aksincha, o‘tgan yilgiga nisbatan o‘lim darajasi pasayganligi aniqlandi.
Jami o‘lim holatlarining 59,6 foizi qon aylanish tizimi kasalliklari, 9,4 foizi o‘simtalardan, 6,7 foizi baxtsiz hodisa, zaharlanish, jarohatlanishlar, 5,9 foizi ovqat hazm qilish a'zolari kasalliklari, 4,9 foizi nafas olish kasalliklari, 1,9 foizi yuqumli va parazitar kasalliklar, qolgan 11,6 foizi esa boshqa turli kasalliklar tufayli qayd etilgan.
Bu borada go‘daklar o‘limi 7,7 mingni tashkil etadi. 1 yoshgacha bo‘lgan bolalar o‘limiga asosan perinatal davrda yuzaga keladigan holatlar, nafas olish a'zolari kasalliklari, tug‘ma anomaliyalar, yuqumli kasalliklar va boshqa kasalliklar sabab bo‘lgan.