Anchadan buyon TV orqali ko'rinish bermay qo'ygan Nilufar Usmonovaning xit qo'shiq chiqarish borasida ham omadi chopmayotgandi. Xonandaning navbatdagi qo'shig'i va unga ishlangan videoklipi esa omma e'tiboriga taqdim etilganiga ko'p bo'lmay turib tilga tushdi. Nilufar Usmonova 30 aprel kuni muxlislari e'tiboriga "Kelaqol, jonim” nomli yangi qo'shig'i va unga ishlangan videoklipni taqdim etdi. Xonanda mazkur qo'shiqda "Kelaqol, jonim, kel yonimga, kel” deya o'z sevgilisini yoniga chorlayotgan, muhabbatdan o't bo'lib yonayotgan, yorini ko'rmoq uchun bedor bo'layotgan ayol nolalarini kuyga solgan. Qo'shiq so'zlari va musiqasi juda yoqimli va birinchi bor tinglaganingizdayoq o'ziga maftun etmay qolmaydi. Klip ham unga hamohang tarzda ishlangan. Nafis va go'zal muhabbat tasvirlangan ushbu videoklip Usmonovaning ijodida alohida o'rin tutishi aniq. Aktyorlar Bobur Yo'ldoshev va Yulduz Rajabova ham o'ziga berilgan vazifani ortig'i bilan uddalashgan. Biroq mazkur klip va qo'shiq orqali xonanda nima demoqchi bo'lgani jumboqligicha qolgan. Bilishimizcha, Nilufar Usmonova navbatdagi qo'shig'ida birovning oilasiga suqilib kirgan, lekin muhabbatidan kechib ketolmaydigan ikki xotinli, oilasidan yashirincha boshqa yostiqqa bosh qo'yadigan erkaklarning "dardini” kuylagan. Xo'sh, bu qo'shiq va klip tarbiyaviy ahamiyatga egami yo targ'ibotchi vazifasini o'taydimi? Klip rejissyori go'yo oilalardagi bunday holatda tarixdan davom etib kelayotgan jarayon demoqchi bo'lgandek, klipda detal sifatida "O'tkan kunlar” asaridan foydalangan. Buyuk adib Abdulla Qodiriyning "O'tkan kunlar” asarini nahot "ikki xotinlilik” targ'iboti deb tushunish mumkin bo'lsa? Bu asarda keltirilgan holat, ya'ni Otabek, Kumush va Zaynabning taqdiri klip voqealariga umuman zid. Biz klipni tanqid qilib, uni qoralamoqchi emasmiz. Aksincha, har bir tomoshabin uni tomosha qilib, o'ziga kerakli xulosa chiqaradi, deb umid qilamiz.