Namangan viloyati Chust tumanida yashovchi fuqaroning tungi klublar haqida yo‘llagan murojaati mazmuni tarbiyaviy ahamiyatga ega bo‘ldi.
Fuqaro o‘z murojatida shunday yozadi: Namangan viloyati, Chust tumanida yashayman. Shaharda bir yil avval "Shafran” va "Zamin fud” nomli tungi klublar ochildi. Shundan so‘ng yoppasiga odamlarning tinchi yo‘qoldi.
Tungi klublar fohishaxona, bangixona va ichkilikxonaga aylanib ketgan. Bu yerdagi janjal, to‘polonlardan esa to‘yib ketdik. Militsiya xodimlari jinoyatchilikning oldini olish uchun reydlar o‘tkazdi. Shundan so‘ng, ochiqchasiga giyohvand moddalar sotayotgan kimsalar ushlandi.
Lekin klublar yana hech narsa bo‘lmagandek ishlamoqda. YAqinda "Kalinka” degan yana bir tungi klub ham ochilar ekan. Tungi klub o‘zbekchilikka, musulmonchilikka to‘g‘ri kelmaydi. Ustiga-ustak, klublar odamlarning tinchini buzmoqda.
Sezib turibsiz, ushbu murojaat matnida ancha-muncha tarbiyali so‘zlar bitib qo‘yilgan. Tungi klublar musulmonchilikka nafaqat o‘zbekchilikka ham to‘g‘ri kelmasligi azaldan ma'lum edi.
Afsuski, bunday joylar kundan-kunga kamayish o‘rniga ko‘payib, palak yozib bormoqda. Lekin tegishli tashkilotlar ushbu holat yuzasidan nimadir qilayotganini ko‘rmayapmiz.
Deyarli har kuni chop etilayotgan "o‘ldi”, "bo‘g‘di”, "pichoqladi”, "ichib otasini o‘ldirdi” mazmunidagi xabarlarda "qahramon” bo‘layotganlar ham tungi klubdagilar tarbiyasini olayotganlar sirasidandir.
Vaziyatga tegishli tashkilotlardan oydinlik kiritishlarini so‘ragan bo‘lardik.