Qashqadaryo viloyatidagi tabiiy gaz talon-toroj qilinayotgani hamda undan hech qanday hujjatlarsiz o‘zboshimchalik bilan foydalanilayotgani aniqlandi. Bu haqda "O‘zbekneftgaz” matbuot xizmati xabar berdi.
2020-yil 26-fevral kuni Bosh prokuratura huzuridagi Majburiy ijro buyurosi Qashqadaryo viloyati boshqarmasi xodimlari hamda "O‘zbekneftgaz” AJning Muborak neft va gaz qazib chiqarish boshqarmasi xodimlari hamkorligida o‘tkazilgan o‘rganish davomida Muborak neft va gaz qazib chiqarish boshqarmasiga qarashli Gazni xo‘jalik hisoblash tizimi hududi atrofida joylashgan Ideal Grant Binokor MChJ rahbari ishtirokida jamiyatga qarashli issiqxona tekshirilgan.
Issiqxonadagi tabiiy gazdan foydalanish holatlari bo‘yicha olib borilgan tekshiruvda hech qanday hujjatlarsiz o‘zboshimchalik bilan ulanib, tabiiy gazdan noqonuniy foydalanish holati aniqlangan.
Ushbu holat bo‘yicha keltirilgan zarar miqdorlari hisob-kitob qilinib, Ideal Grant Binokor MChJdan davlat foydasiga undirish va tegishli chora ko‘rish uchun prokuratura organiga kerakli ma’lumotlar taqdim etilgan.
Yuqoridagi noqonuniy holatni vaqtida nazorat qilmagani va uning kelib chiqishini oldini olmagani, e’tiborsizligi, yetarlicha nazorat qilmaganligi tufayli Muborak neft va gaz qazib chiqarish boshqarmasi rahbari o‘rinbosari — bosh muhandisi ishdan olingan.
Hozirda Jinoyat kodeksining 1852-moddasi (Elektr, issiqlik energiyasi, gaz, vodoprovoddan foydalanish qoidalarini buzish) tartibida dastlabki surishtiruv ishlari olib borilmoqda va Muborak neft va gaz qazib chiqarish boshqarmasi rahbari o‘rinbosari — bosh muhandisining ushbu "jinoyat”ga aloqadorligi holati tegishli tartibda o‘rganilmoqda.
2019-yilning oktabr oyida Muborak neft va gaz qazib chiqarish boshqarmasi boshlig‘i ishdan olingan edi.