Yangi Zelandiyaning "Oklend Siti” klubi Marokashning "Mag‘rib” jamoasini penaltilar seriyasida mag‘lub etdi va klublar o‘rtasidagi 2014-yilgi jahon chempionati chorak finaliga yo‘l oldi, deb xabar bermoqda "Kun”. FIFA rasmiy saytidagi axborotga ko‘ra, musobaqa mezboni — Marokashning "Mag‘rib” hamda Okeaniya mintaqasining eng kuchli jamoasi — "Oklend Siti” o‘rtasidagi uchrashuv asosiy va qo‘shimcha vaqtlarida hisob ochilmagan.

Penaltilar seriyasida esa "Oklend Siti” jamoasi 4:3 hisobida g‘alaba qozondi. Musobaqa chorak finalida "Oklend” Afrika chempioni bo‘lgan Jazoirning "Setif” jamoasiga qarshi to‘p suradi. O‘yin 13-dekabr, shanba kuni bo‘lib o‘tadi.

Qayd etish joiz, YeChL — 2013/2014 chempioni Madridning "Real” futbol klubi JCh — 2014dagi ishtirokini 16-dekabrdan boshlaydi. Madridliklar shu kuni JCh — 2014 yarim finali doirasida "Krus Asul” (Meksika/Shimoliy Amerika) — "Vestern Sidney” (Avstraliya/Osiyo) juftligi g‘olibiga qarshi to‘p suradi.

Ma’lumot uchun, "Oklend Siti” futbol klubi JCh — 2014ga tayyorgarlik doirasida BAAda Mirjalol Qosimov boshqaruvidagi O‘zbekiston milliy terma jamoasiga qarshi maydonga tushgan va 0:0 hisobida durang o‘ynagan edi.