Meksikadagi Gvadalaxara sobori mamlakatdagi eng e'tiborga sazovor joylardan biri sanaladi. Ushbu cherkovning qurilish ishlari XV asrda boshlangan. Cherkov bir necha marta to‘liq ta'mirdan chiqarilgan. Bu joy doim mahalliy aholi vakillari, sayyohlar bilan gavjum.
Gvadalaxara cherkovi mahalliy aholi hamda sayyohlarni faqat o‘z ko‘rinishi va chiroyi bilan emas, balki bino ichida mo‘miyolangan holda yotgan Inosensiya ismli marhuma qizning saqlanishi bilan ham mashhur. Afsonalarga ko‘ra, bu qiz katolik diniga o‘tishni istagani uchun bundan 300 yil avval, o‘z otasi tomonidan o‘ldirilgan. Inosensiya o‘qishni, ta'lim olishni istagan va katolik maktabiga o‘qishga kirgan. Uning qaroridan jahli chiqqan otasi qiziga bir necha bor pichoq bilan jarohat yetkazgan. Shundan so‘ng, qizaloqning tanasi mo‘miyolangan va unga "muqaddas” deb qaray boshlashgan.
Yaqinda Gvadalaxara cherkoviga tashrif buyurgan sayyohlardan biri bino ichini videotasvirga olayotib, g‘aroyib holatga duch keldi. Kamera Inosensiyaning ustida to‘xtaganida qizaloq kutilmaganda ko‘zlarini ochgan. (!) Ayni tasvirlar ijtimoiy tarmoqlarda paydo bo‘lgach, Inosensiyaning muxlislari dunyo bo‘ylab yanada ko‘payib ketdi. Albatta, doimgidek videotasvirlarni tomosha qilgan tarmoq foydalanuvchilari orasida bu hodisani yolg‘on deguvchilar, videotasvirlar turli dasturlar orqali montaj qilinganini aytayotganlar ham topildi. Biroq Mexikodagi Gvadalaxara cherkovida sokin uxlayotgan marhuma Inosensiya haqidagi hikoya biz sizga so‘zlagan afsonada keltirilgandek talqin qilinadi.