Главная » 2021 » Iyun » 23 » “Ko‘ngilochar tadbirlarni ko‘paytirib yuboryapmiz”. O‘zbekistonda koronavirusdan kasallanish ortayotganining sabablari aytildi

---

22:21 “Ko‘ngilochar tadbirlarni ko‘paytirib yuboryapmiz”. O‘zbekistonda koronavirusdan kasallanish ortayotganining sabablari aytildi

Koronavirusga qarshi kurashish shtabi a’zosi Sevara Ubaydullayeva 23-iyun kuni AOKAda o‘tkazilgan brifingda O‘zbekistonda koronavirusdan kasallanish ko‘payib ketayotganining sabablariga to‘xtalib o‘tdi. Uning so‘zlariga ko‘ra, buning bir necha sabablari bor. "Aholi orasida niqoblar taqilmay qo‘yilgani — bu infeksiyani odamdan odamga yuqish uchun juda qulay sharoit, ya’ni hozir kunlar issiq, havo quruq — virusning havoda harakatlanishiga to‘sqinlik yo‘q va u bemalol insonlarning yuz va qo‘l terisiga yoki ko‘z shilliq qavatiga, burundan nafas olamiz — havodagi virus burun shilliq qavvatiga yoki tomoqqa tushadi hamda hujayra ichiga kirib, kasallik chaqirishga imkoniyat qidiradi. Qo‘llarni sovunlab yuvmay qo‘ydik yoki spirtli antiseptiklardan foydalanmay qo‘ydik — bu esa qo‘l terisiga tushgan virusning tozalanmasligiga sabab bo‘ladi, qo‘llar ko‘z, burun yo og‘izga tekkizilganda virus organizmga tushadi, natijada bu kasallik chaqirishni yanada kuchaytiradi; Ijtimoiy masofani saqlamay qo‘ydik — ya’ni juda ko‘p to‘y-hashamlar, tug‘ilgan kunlar va odamlar to‘planishi mumkin bo‘lgan ko‘ngilochar tadbirlarni ko‘paytirib yubormoqdamiz. Bu kabi ko‘ngilochar tadbirlarda: bir oila a’zolaridan tashqari bir necha oilalar va odamlar soni 30 dan ortib ketmoqda; tadbirlar yopiq joylarda, umumiy sig‘imdan 50 foizdan ortiq odamlar ishtiroki kuzatilmoqda, ya’ni agar 100 kishilik to‘yxonada tadbir bo‘lsa, talab bo‘yicha 50 kishidan ortmasligi kerak, lekin bugungi kunda to‘y-hashamlarda 100-150 tadan odam ishtirok etmoqda; bunday ko‘ngilochar tadbirlarga hech kim oldindan PZR-testini topshirmaydi va kelayotgan mehmonlardan test natijasi so‘ralmaydi; kelayotgan mehmonlarning tana harorati o‘lchanmaydi; niqoblar taqilmaydi va spirtli antiseptiklar bilan tez-tez qo‘llar ishlov berilmaydi. Axir biz to‘y-hashamlarga ko‘ngil ochish uchun boramiz, unda ovqatlanish kerak, bunda uzoq davom etuvchi suhbatlar va muloqotlar bo‘ladi. Bularning hammasi koronavirus tarqalishiga katta zamin yaratmoqda”, — degan u. Eslatib o‘tamiz, mamlakatda kunlik kasallanish holatlari soni yana ortib bormoqda. Oxirgi 4 kun ichida 3 marta kunlik kasallanishlar soni 400 tadan oshdi. 22-iyunda 419 kishida, 21-iyunda 395 kishida, 20-iyunda 427 kishida va 19-iyunda 415 kishida COVID-19 qayd etildi. Kasallikka chalinish holatlari ko‘payishi ortidan O‘zbekistonda bir qator cheklovlar joriy etildi. Jumladan, jamoat transportiga niqobsiz chiqish taqiqlandi, sanatoriy, pansionat va bolalar oromgohlariga borish uchun PZR-test tahlili talab etilmoqda, Afg‘oniston bilan chegara yopildi. Shuningdek, koronavirusga qarshi emlanuvchilar guruhi kengaytirilib, 50 yosh va undan kattalar hamda oliy ta’lim muassasalari professor-o‘qituvchilari bepul vaksina olishi mumkin bo‘ldi.

1 2 3 4 5 Категория: Har-Hil | Просмотров:376 | Добавил: moderator | Теги: yangilik | Рейтинг: 0.0/0

Всего комментариев: 0