Главная » 2020 » Mart » 7 » IShID Afg‘onistonda yuz bergan terakt uchun javobgarlikni o‘z zimmasiga oldi

---

10:52 IShID Afg‘onistonda yuz bergan terakt uchun javobgarlikni o‘z zimmasiga oldi

Afg‘onistonda 6-mart, juma kuni, yuz bergan va o‘nlab odamlarning hayotiga zomin bo‘lgan terakt uchun javobgarlikni IShID o‘z zimmasiga oldi. Bu haqda Reuters xabar bermoqda. IShID javobgarlikni o‘z zimmasiga olishdan oldin "Tolibon” vakillari jinoyatga aloqadorligini qat’iyan rad etgan. So‘nggi ma’lumotlarga ko‘ra, hujum natijasida Kobulda bo‘lib o‘tgan xotira marosimi ishtirokchilaridan 29 kishi halok bo‘lgan, 61 kishi jarohat olgan. Ushbu tadbir Sovet Ittifoqining Afg‘onistonga bosqini paytidagi mujohidlar rahbari Abdulloh Ali Mozoriy xotirasiga bag‘ishlangan va mamlakatning amaldagi bosh vaziri Abdulla Abdulla ishtirokida bo‘lib o‘tayotgan edi. Tinchlik oliy kengashi rahbari Muhammad Karim Xaliliyning ma’ruzasi paytida otishma ovozlari eshitilgan. AQSh va "Tolibon” harakati 29-fevral kuni Qatarning Doha shahrida bo‘lib o‘tgan marosimda tinchlik bitimini imzoladi. Bitimni AQShning Afg‘oniston bo‘yicha maxsus vakili Zalmay Xalilzod va "Tolibon” rahbarining o‘rinbosari, harakatning Qatar siyosiy idorasi rahbari Mulla Abdulloh G‘ani Baradar imzoladi. Biroq AQSh bilan tinchlik haqida kelishgan "Tolibon” 2-mart kuni hukumat kuchlariga qarshi harbiy harakatlar qayta boshlanganini e’lon qilgan. IShID ekstremistik guruhi jahonning bir qator mamlakatlari va xalqaro tashkilotlar tomonidan "terrorchilik tashkiloti” deb topilgan.

1 2 3 4 5 Категория: Har-Hil | Просмотров:497 | Добавил: moderator | Теги: yangilik | Рейтинг: 0.0/0

Всего комментариев: 0