— Agarda hammasi qalbdan gapirilsa hech kim majbur qilmasada, qo‘llar beixtiyor qarsak chaladi. Prezidentimiz ilgari surayotgan madaniy jabhadagi ishlarga shunday ko‘tarinki ruh va ishonchda baho bera olaman. San'at bu alohida kasb, lekin taksiga chiqsam, oddiy haydovchi ham bugungi kundan minnatdor.
Hammaning og‘zida "Yaxshi ishlar bo‘lmoqda” deyilishi eng keraklisi. Bu birdamlikning hamda biriktira olishning natijasidir. Aytish joiz, keksa yoshdagi san'at vakillari na dublyajga, na tasvirga olish ishlarida qatnashishayotgandi. Ancha kamnamo bo‘lib qolishgandi. Shu qatorida men ham. Sababi nafaqadagi aktyor rol o‘ynasa gonorari yoki nafaqa pulidan qirqib qolinardi. Fidoiylik har qaysi artistda bor. Pul uchun bo‘lsa, xizmat haqisiz rol ijro etgan paytlarimiz bo‘lgan. Boisi, kichik gonorarni, deb nafaqadan kesilardi. Mana shu qisqa davrda keksa aktyorlar, unvoni bor aktyorlar to‘liq ish haqi oladigan bo‘lishdi. Artistning rol uchun oladigan gonorari va nafaqasi ham saqlanib qolindi. Bu yil ijodimda sermahsullik bor. Masalan, "Meros 2” serialida menga teskari xarakterdagi rolni o‘ynadim. Shunaqasini orzu qilardim. Bunda tomoshabinlar meni qahri qattiqroq obrazda ko‘rishadi. Ma'qul bo‘ladi, degan umiddaman.
"Armonli yillar” serialida qiyinchiliklarni boshidan o‘tkazgan, yolg‘iz yashagan bo‘lsada, insoniylik fazilatlarini saqlab qolgan qahramonni gavdalantirdim. Mana shu osoyishta, kundan-kun chiroy ochib borayotgan, imkoniyatlari kengayotgan ona zaminda ijod qilayotganimdan faxrlanaman.
Davlatimizning mustaqillik sanasi, shukuhli tantanasi butun O‘zbekiston ahliga muborak bo‘lsin. Tilagim, avvalo osmonimiz hamisha musaffo bo‘lib, tan sog‘ligi mustahkam va yoshidan qat'iy nazar kishi kimgadir kerakli bo‘lsin!