Qish mavsumida qor, yomg‘irdan keyingi izg‘irin sovuqda turli kasalliklar ko‘paya boshlashi yomon. Ayniqsa, tumov (gripp) yuqumli bo‘lib, uning asoratlari ayanchli oqibatlarga olib kelishi mumkin.
Kasallikning boshlanish davri turli belgilarda namoyon bo‘ladi: holsizlik, bosh og‘rig‘i, ishtahaning yo‘qolishi. Ko‘p uchraydigani bu – tomoq quruqshab, qirilishidir. Og‘iz shilliq qavatining zararlanishi virusli infeksiyalar yuqushi tufayli sodir bo‘ladi.
Virusli infeksiya atrofdagilarga juda tez tarqaladi. Ma'lumki, odam aksa urganda, yo‘talganida yoki gapirganida og‘zidan ko‘z ilg‘amas suyuqlik tomchilari atrofga sachraydi. Virus ana shu tomchilar orqali yuqishi bilan xavfli.
Kasallikning belgilari namoyon bo‘lganda, nima qilish kerak? Aksariyat hollarda kasallik kechqurun boshlanadi. O‘zbilarmonlik bilan turli dori vositalarini shifokor maslahatisiz qabul qilish mumkin emas.
Avvalo oila a'zolaringizning xavfsizligini ta'minlash zarur. Buning uchun xonani shamollatib, po‘stlog‘i archilgan piyoz yoki sarimsoq donasini idishga solib qo‘ying. Tumov boshlanganda isiriq tutatish maqsadga muvofiq emas. Chunki tutun tomoqni yanayam qurutib, nafas yo‘llarini qisishi mumkin. Bir chimdim moychechak, tuz yoki isiriq solingan damlama yordamida og‘iz bo‘shlig‘ini chayish kerak. Bu tomoqni ancha yumshatadi.
Yotish oldidan moychechakli yoki isiriqli damlamaga bir choy qoshiq asal solib, issiqligida ho‘plab-ho‘plab asta ichiladi. Damlamaning shifobaxsh hususiyati ertalabgacha og‘riqsiz tiniqib uxlab olishingizga yordam beradi.
Ertalab kasallikning belgilari yo‘q bo‘lganday tuyuladi. Ammo shifokorga borish, buyurilgan dori vositalari yordamida davolanish zarur. Yosh bolalarda tumov og‘irroq kechadi. Shu sababli kasallikning belgilari paydo bo‘lishi bilanoq shifokorga murojaat etish kerak.