Forbes jurnali Alisher Usmonovni yil biznesmeni deb e’lon qildi. Bu haqda jurnalning 2015-yil yanvari uchun chiqarilgan sonida aytiladi, unda 2014-yilning eng mashhur tadbirkorlari ro‘yxati keltirilgan. Jurnal fikricha, Apple va Facebook kompaniyalari aksiyalarini sotib yuborgani, shuningdek Alibaba (Amazon’ning xitoycha muqobili)dagi aksiyalari paketini ko‘paytirgani Usmonovning eng muvaffaqiyatli qarorlari bo‘ldi.
Forbes’ning an’anaviy "Yil biznesmeni” loyihasi tahririyatda ovozga qo‘yish natijalariga ko‘ra tuziladi. Bunda asosiy mezon nomzodlarning investitsiyalari keltirgan natijalar bo‘lsa-da, boshqa omillar ham e’tibordan chetda qolmaydi. Masalan, o‘z tanlovini amalga oshirishda tahririyat Usmonovning xayriya bilan bog‘liq faoliyatini ham hisobga oldi.