Innovatsion rivojlanish vazirligida Xitoyning Changan Automobile Group kompaniyasi vakillari ishtirokida uchrashuv o‘tkazildi. Unda hamkorlik qilish va O‘zbekistonda elektr quvvati bilan ishlaydigan avtomobillar ishlab chiqarish imkoniyatlari muhokama etilgan.
Changan kompaniyasi vakili Farg‘ona vodiysida elektromobillar yig‘ish sexini qurish niyati borligini ma'lum qildi. Innovatsiya vaziri o‘rinbosari Otabek Nazirov mazkur loyihani amalga oshirilishini qo‘llab-quvvatlashga tayyor ekanini bildirgan. Tomonlar tez kunlarda hamkorlik to‘g‘risidagi memorandumni imzolashi kutilmoqda.
"Loyiha muvaffaqiyatli ishga tushgan taqdirda, birinchi bosqichda 15-20 million AQSH dollari miqdorida investitsiya kiritish, 100–150 ta ish o‘rini tashkil qilish, bir yilda mingta yirik uzelli elektromobillar (Spark va Nexia’ga o‘xshash) yig‘ish mumkin bo‘ladi”, deyiladi xabarda.
Ma'lumot uchun, Changan Automobile Group kompaniyasi Xitoy eng ko‘p avtomobil ishlab chiqaruvchi kompaniyalarining "katta to‘rtligi”ga kiradi. Avtokompaniyaning Ford Motor, Suzuki Motor, Mazda Motor va Peugeot Citroen kabi yirik konsernlar bilan qo‘shma korxonalari mavjud. Changanning bosh idorasi Chunsin shahrida joylashgan.
Mazkur kompaniya O‘zbekistonda gibrid dvigatelli va butunlay elektr kuchida ishlaydigan zamonaviy avtomobillar ishlab chiqarishga urg‘u berish niyatida. 2025 yilga kelib barcha turdagi (kichik metrajli avtomobillardan tortib kupe kuzovli oliy toifadagi avtomobillaragacha) 21 modeldagi faqat elektr quvvati bilan ishlaydigan yangi elektrmobillar va 12 ta gibrid modellar ishlab chiqarilishi rejalashtirilgan.