Farg‘onada 20 yoshli qiz nikohsiz tug‘ilgan farzandidan voz kechishga urindi. Farg‘ona viloyati Oltiariq tumani prokuraturasiningxabar berishicha, voqea 3-mart kuni yuz bergan.
Oltiariq tumanida ota-onasi bilan yashovchi 2000-yilda tug‘ilgan Z.A. shu tumanda yashovchi X.T. bilan tanishib, o‘zaro yaqin munosabat o‘rnatadi. X.T . Z.A.ni yaxshi ko‘rib qolganligi sababli uylanish maqsadida 2019-yil fevral oyida unga sovchi yuboradi. Qizning ota-onasi uni kuzda turmushga berishini aytib, to‘yga rozilik bermagan.
Shundan so‘ng Z.A.ning taklifi bilan X.T. 2019-yil fevral oyida soat taxminan 23:00 larda qiz bir o‘zi yotgan xonaga deraza orqali tushib, u bilan ikki marotaba jinsiy aloqada bo‘lib, tonggi soat 03:00 larda uydan chiqib ketgan.
Ular o‘rtasidagi o‘zaro munosabatlar davom etib, X.T. 2019-yil 12-iyun kuni ishlab pul topish maqsadida Rossiyaning Sankt-Peterburg shahriga ketib, u yerdan 2019-yilning sentabr oyida qaytib kelgan. Z.A. homilador bo‘lib qoladi hamda 2020-yil 3-mart kuni soat 04:00 larda xonadoni hovlisida o‘g‘il farzandni dunyoga keltiradi. Z.A. farzandini uyga olib kirib, oziqlantiradi.
Shundan so‘ng ota-onasi bilib qolishi va mahallada sharmanda bo‘lishidan qo‘rqib, 3-mart kuni soat 08:00 larda chaqalog‘ini qizil rangli ayollar kostyumiga o‘rab, tuman markaziy buyum bozori orqasidagi ko‘p qavatli uylar yoniga olib kelib, o‘zi ishlayotgan chevarxona yonida "Kimdir yangi tug‘ilgan chaqaloq tashlab ketibdi, topib oldim” deb, tuman IIB navbatchilik qismiga qo‘ng‘iroq qilgan.
Shundan so‘ng Z.A. va uning yangi tug‘ilgan chaqalog‘i tuman markaziy shifoxonasiga yuborilgan. Fuqaro Z.A. tibbiy ko‘rikdan o‘tkazilgan vaqtda ushbu chaqaloqni o‘zi tuqqanligi aniqlangan va unga tibbiy muolajalar ko‘rsatilgan. Z.A. ushbu chaqaloqni o‘zining hovlisida tuqqanligi to‘g‘risida tushuntirish xati bergan.
Hozirda Z.A. va farzandining ahvoli yaxshi, chaqaloq Z.A.ning qaramog‘iga olingan. Chaqaloqqa 4-mart kuni tug‘ilganlik haqidagi guvohnoma olingan va 5-mart kuni shifoxonadan uyiga ruxsat berilgan.
Mazkur holat yuzasidan tuman prokuraturasi tomonidan tergovga qadar tekshirish olib borilmoqda, Z.A. va uning chaqalog‘iga nisbatan sudga oid tibbiy ekspertiza tayinlangan, natijasi haqida qo‘shimcha axborot beriladi, deyiladi xabarda.