O‘tgan yili mashhur juftlik o‘rtasidagi munosabatlarga darz ketgani, ularning ajrashish arafasida turganliklari haqida xabarlar tarqalgandi.
Oradan ko‘p o‘tmay, Bekxemlar oilasidagi ajrim bilan bog‘liq gap-so‘zlarga oydinlik kiritish, ular haqida turli tasdiqlanmagan maqollalarni chop etayotgan nashrlarni ogohlantirish maqsadida, Bekxemning rasmiy vakili OAVga bergan intervyusida, jurnalistlarning barcha savollariga qisqacha qilib, "Bu gap-so‘zlarda zarracha haqiqat yo‘q. Ajrim borasidagi yolg‘onlarni to‘qib chiqargan odam gallyutsinogen giyohvand moddalarni iste'mol qiladiganga o‘xshaydi. U aqlini yig‘ib, real hayotga qaytishi kerak”, deb javob bergandi.
Shundan so‘ng bu mavzudagi maqolalar kamaydi. Biroq, ayni vaqtda eski mavzu yana jonlandi.
Biroz avval, sobiq futbolchining bosh ma'muri Simon Oliveyra tomonidan boshqariladigan "Doyen Global” serveri xakerlar hujumiga uchradi. Xakerlar hujumi oqibatida Bekxem va Oliveyra o‘rtasidagi yozishmalar omma uchun ochiqlandi. Bu haqda "Newspotok.ru” xabar qildi.
Ular o‘zaro yozishmalarida, asosan, ish borasidagi masalalarni muhokama qilishgan. Biroq, xakerlarni ko‘proq Devidning hayriya ishlari va ritsarlik unvoni borasidagi gaplar qiziqtirgan ko‘rinadi.
Gap shundaki, 2014 yili Devid Bekxem Yelizaveta II
qo‘lidan ritsarlik unvonini olishi lozim edi. Biroq hayriya ishlari yetarlicha amalga oshirilmaganligi sababli, u ushbu unvonni ololmadi.
Xakerlar tomonidan oshkor etilgan yozishmada, Devid pullarini kimdir va nima uchundir havoga sovurish niyatida emasligi, ritsarlik unvoni esa uni umuman qiziqtirmasligi haqida yozgan.
Bu hali hammasi emas. Yozishmalarda Devid va Viktoriyaning rostmana ajrashayotganliklari haqidagi so‘zlar ham borligi xabar qilinmoqda.
Amerika ommaviy axborot vositalarida Viktoriya Bekxem Devidning pochtasidagi qator moliyaviy hujjatlarni o‘qigan va turmush o‘rtog‘i bilan ajrashishga qaror qilgani aytilmoqda.
Biroq Bekxemlarning rasmiy vakili yana bir bor bu boradagi gaplar yolg‘on ekanini bildirib, OAV bergan ma'lumotni tasdiqlamadi. Bekxemlarning o‘zidan ham biror rasmiy xabar chiqmadi.
Ma'lumot uchun, juftlikning turmush qurganiga 18 yil to‘ldi. Shu munosabat bilan, ular 4 nafar farzandi guvohligida nikoh vaqtida kelin va kuyov bir-biriga beradigan va'dalarini aytib, ont ichishdi. Bu esa ajrim borasidagi fikrlar mish-mish ekanidan dalolat bermoqda.