Har birimiz kelajak uchun kattami-kichikmi rejalar tuzamiz va olditmizga maqsadlar qo‘yamiz. Ular amalga oshishi uchun imkon qadar harakat qilamiz. Tasavvuringizda besh yildan keyingi hayotingizni tasavvur qilib ko‘rganmisiz? Siz u vaqtda qanday bo‘larkansiz? Keling, buni quyidagi test orqali aniqlab ko‘ramiz! Ishga kirishishdan avval har qanday mantiqiy fikrlashni bir zumga bo‘lsa-da tark eting, ijodiy salohiyatingizga esa erkinlik bering.
Kerak bo‘ladi: ikkita oq qog‘oz (A3 formatida bo‘lsa yanada yaxshi) , rangli qalamlar, ish stoli, jimlik va yarim soat vaqt.
Ish tartibi:
1. Birinchi varaq markaziga o‘zingizning hozirgi holatingizni chizing, bo‘y-bastingiz to‘liq bo‘lsin. Rasm chiroyli chiqishi shart emas, shuning uchun surat chizishdagi "uquvsizman” degan bahona o‘tmaydi. Suratingiz yoniga hozir hayotingizdagi muhim insonlar, munosabatlar, ishlar va boshqa narsalarni ramziy belgilar bilan chizib chiqing.
2. Chizib bo‘ldingizmi? Uni teskari o‘girib qo‘ying va keyingi shartga o‘ting. Ikkinchi qog‘ozga xuddi shu tartibda rasm chizish lozim. Ammo endi 5 yil oldinga nazar tashlashga to‘g‘ri keladi. Kelajakni tasavvur qilishni boshladik!
3. Vazifani noto‘g‘ri bajarishdan cho‘chimang, qanday rasm chizilganidan qat'iy nazar, sizning hozirgi va kelajak hayotingiz haqida borini bilib olish imkoni bo‘ladi. Endi suratlar nima deyayotganini aniqlaymiz!
Test kaliti
Ikkala suratni qarshingizga qo‘yib, tahlil qilishni boshlang. Qiyofangizga nazar soling. Hozirgisi va kelajakdagisining o‘rtasida nechog‘lik farq bor? Balki siz 5 yildan keyin ozg‘inroq, kelishganroqdirsiz? Qaysi suratda siz tabassum qilib turibsiz? Agar kelajakdagi suratda tashqi qiyofangizda tub burilish kuzatilsa, demak siz o‘sha narsadan hozir mamnun emassiz. Bordi-yu, ikki suratda ham bir xil ko‘rinishda bo‘lsangiz, o‘ylab ko‘ring, o‘zgarishlardan cho‘chimayapsizmi? Bir xillik joningizga tegmasmikan?
Endi sizni qurshab turgan ramziy belgilarga e'tibor qarating. Ularni birma-bir sanab ikkita ro‘yxat tuzing: hozirgi va kelajakdagilari. Ro‘yxat hayotingizning barcha jabhalarini qamrab olganmi? Kelajakda nimalarga erishishni istayapsiz? Qanday cho‘qqilarni zabt etishingiz yoki nimalardan xayolan voz kechganingiz haqida fikrlang. Agar hech nima o‘zgarmagan bo‘lsa-chi? O‘ylab ko‘ring, orzularingizdan voz kechayapsizmi yoki ular uchun kurashishni davom ettirayapsizmi?
Barchasi o‘z qo‘lingizda!
5 yildan keyin bundan-da ko‘prog‘iga erishishni istaysizmi? Ish pog‘onasida ko‘tarilish, shaxsiy hayotdagi o‘zgarishlar, dunyoqarashingizni kengaytirish uchun nimalar qilyapsiz? Moliyaviy holatingiz va turmush tarzingizni yaxshilash uchun-chi? «hozircha hech narsa» deysizmi?! Unda bu ishga qachon kirishishni rejalashtiryapsiz? Maslahatimiz, biror soniyani ham bekorga o‘tkazmang!
Suratdagi qaysi ramziy belgilar sizga yaqin va yiroq joylashgan? Qay biri sizga yaqinroq bo‘lsa, demak aynan o‘sha narsa siz uchun muhim sanaladi. Tahlil qiling, siz birinchi o‘ringa qo‘yayotganlar narsalar keraklimi yoki keraksiz?
So‘nggi vazifa!
Ikkinchi suratni tashlab yubormang! Uni saqlab qo‘ying. 5 yildan so‘ng, albatta, unga ko‘z tashlash yodingizdan chiqmasin! Ana o‘shandagina haqiqiy sarhisobni amalga oshirasiz.