1991 yil 31 dekabrda O‘zbekiston Respublikasi Mustaqilligini tan olgan Belgiya Qirolligi 1992 yil 10 mart kuni O‘zbekiston bilan diplomatik munosabatlar o‘rnatgan. Bu yil mazkur hodisaga 25 yil to‘ldi.
Mamlakatlar o‘rtasida o‘rnatilgan diplomatik munosabatlarning 25 yilligi munosabati bilan, Belgiya Qiroli Filipp Shavkat Mirziyoyevga tabrik yo‘lladi.
"2017 yilda Belgiya va O‘zbekiston o‘rtasida diplomatik munosabatlar o‘rnatilganining 25 yilligini nishonlayotganimiz menga katta mamnuniyat bag‘ishlaydi. O‘tgan yillarda mamlakatlarimiz o‘rtasidagi hamkorlik turli sohalarda muvaffaqiyatli rivojlanmoqda, ikki tomonlama munosabatlarimizning muhim asosi bo‘lgan do‘stona aloqalar va o‘zaro anglashuv izchil mustahkamlanmoqda”, deyiladi Qirol maktubida.
Belgiya Qirolligining Bosh vaziri Sharl Mishel ham O‘zbekiston rahbariyatini muborakbod etdi:
"O‘zbekiston mustaqillikka erishgan kundanoq o‘z suverenitetini mustahkamladi hamda mintaqaning muhim siyosiy va iqtisodiy salohiyatga ega davlatiga aylandi. O‘tgan davr mobaynida mamlakatlarimiz samarali hamkorlik qilib kelmoqda, ammo uni yanada diversifikatsiya qilish borasida katta salohiyat mavjud”.
O‘z navbatida, O‘zbekiston Respublikasi Prezidenti Shavkat Mirziyoyev ham tabrik yo‘llab, o‘tgan davrda ikki davlat o‘rtasidagi mustahkam do‘stlik va o‘zaro anglashuv an'analariga asoslangan ezgu va amaliy munosabatlar o‘rnatilganini qayd etdi.
Shavkat Mirziyoyev ikki mamlakat o‘rtasidagi munosabatlarni rivojlantirishga qaratilgan birgalikdagi sa'y-harakatlar davom ettirilishiga, hamkorlik o‘zaro hurmat, teng huquqlilik va ishonch tamoyillari asosida yanada mustahkamlanishiga ishonch bildirdi.