Belgiya Turkiya hududidan chiqarib yuborilgan shaxsning jangari ekani haqidagi ogohlantirishlarga qaramasdan unga nisbatan hech qanday chora ko‘rmadi.
Bryusseldagi aeroportda o‘zini portlatgan xudkush terrorchi Ibrohim Bakraui o‘tgan yili Turkiyadan deport qilinganligi ma'lum bo‘ldi. Belgiya hukumati Turkiya hududidan chiqarib yuborilgan shaxsning jangari ekani haqidagi ogohlantirishlarga qaramasdan unga nisbatan hech qanday chora ko‘rmagan. Bu haqda Turkiya prezidenti Rajab Toyib Erdo‘g‘an aytib o‘tdi, deya "Reuters” xabar berdi.
Xabarda aytilishicha, Ibrohim Turkiyaning janubiy qismida, Suriya bilan chegara viloyat G‘oziantepda qo‘lga olingan va Gollandiyaga deport qilingan. Turkiya bu haqda golland hukumatini ham ogohlantirgan. Bakrauining hibsga olinmaganligining sababi, biror jinoyat bo‘yicha dalillar topilmaganida. Bunday holat o‘tgan yilda Parijda o‘zini portlatgan terrorist Ibrohim Abdusalomga nisbatan ham kuzatilgan. U 2015 yilning boshida Turkiyadan Belgiyaga deport qilingan edi.
Turkiya prezidenti devonxonasining tasdiqlashicha, Bakraui Gollandiyaga deport qilingan. Keyinchalik uning "terrorizmga aloqadorligi aniqlanmagan”dan so‘ng, Belgiya hukumati tomonidan ozod etilgan. Lekin, Gollandiya Bakrauini Belgiya hukumatiga qachon topshirgani aniq emas.
Belgiya gazetasi "LeSoir”da yozilishicha, Adliya vaziri Koyen Geyen Ibrohim Bakrauining Gollandiyaga deport qilinganini tasdiqlagan. Bryusseldagi teraktlar Istanbulda xudkush terrorchi o‘zini portlatgandan bir necha kundan so‘ng sodir bo‘ldi. Bunda DAISH terroristik tashkilotining qo‘li borligi aytilgan edi.
Qo‘poruvchilik harakati natijasida uch isroillik odam va bir Eron fuqarosi halok bo‘ldi, o‘nlab odam jarohatlangan edi.
Eslatib o‘tamiz, 22 mart, seshanba kuni Bryusseldagi aeroport va metro bekatida to‘rtta portlash yuz berdi. Voqyea yuzasidan javobgarlikni DAISH terroristik tashkiloti o‘z bo‘yniga oldi. Terkaktni ikki aka-uka Xolid va Ibrohim Bakraui amalga oshirgani aniqlangan edi.