Avstriya hukumati Turkiya Iqtisodiyot vaziri Nixat Zeybekchining mamlakatga kirishiga ruxsat bermadi. Bu haqda "Reuters” agentligi xabar tarqatdi.
Nixat Zeybekchi mahalliy turk jamiyati tomonidan harbiy to‘ntarishning bir yilligiga bag‘ishlab o‘tkazishni rejalashtirgan marosimda ishtirok etishni maqsad qilgan edi.
Avstriya Tashqi ishlar vazirligining rasmiy vakili vazir Sebastyan Kurs haqiqatan ham Turkiya Iqtisodiyot vaziriga mamlakatga kirishni taqiqlaganini ma'lum qildi. Xabarlarga qaraganda, rejalashtirilgan tadbirlar keng miqyosda o‘tkaziladi, tukriyalik vazirning tashrifi esa jamoat tartibini buzishi va Avstriya xavfsizligiga tahdid solishi mumkin.
Avvalroq, Niderlandiya Tashqi ishlar vazirligi Turkiya Bosh vazir o‘rinbosari Tug‘rul Turkeshni ham harbiy to‘ntarishning bir yilligiga bag‘ishlangan tadbirlarda ishtirok etish uchun mamlakatga kelmasligi ma'qulligini bildirgan edi.
Mart oyi o‘rtalarida Niderlandiyaga Turkiya Tashqi ishlar vaziri Mavlud Chavusho‘g‘lu hamda oila va ijtimoiy siyosat vaziri Betul Sayyan Kayya ham kiritilmagan edi. Ular mahalliy turk diasporasi tomonidan konstitutsiyaga o‘zgartirish kiritish borasida tashkil etilgan mitinglarda ishtirok etishlari lozim edi.
Turkiyada 2016 yilning 15 iyul sanasida bir guruh isyonchilar hokimiyatni o‘z qo‘llariga olish maqsadida to‘ntarish o‘tkazishgan edi. Voqyea sabab 230 ga yaqin kishi vafot etdi, 2 mingdan ortig‘i jabrlandi. Bu isyondan so‘ng Turkiyada ommaviy ravishda "tozalash” ishlari boshlandi, ya'ni to‘ntarishga aloqador bo‘lgan barcha mansabdor shaxslar, politsiya vakillari, harbiylar qo‘lga olindi. So‘nggi xabarlarga qaraganda, ayni vaqtda 150 ming kishi tergov qilinmoqda, yana 145 ming kishi gumon ostida, shuningdek, 49 ming kishi hibsga olingan.