Jeni otasining yuragi ko‘chirib o‘tkazilgan kishidan to‘yida otasining vazifasini bajarishni so‘radi...
AQSH odatlariga ko‘ra, nikoh o‘qish marosimida kelinni kuyov oldiga uning otasi kuzatib boradi. Agar kelinning otasi biror sabab bilan marosimda ishtirok eta olmasa, kelinchakning amakilari, akasi yoki ukasi bu vazifani ado etishi kerak.
Bir necha kun avval Pensilvaniyada o‘tgan to‘y marosimida kelinchakning otasi boshqa inson tanasida tashrif buyurdi, deb yozadi "Medportal.ru” nashri. Gap shundaki, bundan 10 yil avval, 2006 yilning sentyabrida uylariga tushgan 16 yoshli o‘g‘ri Jeni Stepiyenning otasiga qarata o‘q uzadi. Erkak og‘ir ahvolda shifoxonaga yetkaziladi. Biroq oila boshlig‘ini saqlab qolishning imkoni bo‘lmaydi. Shundan so‘ng, Stepiyenlar oilasi otalarining tana a'zolarini boshqa bemorlarga transplantatsiyaga berishga rozilik bildirishadi. Shu tariqa Maykl Stepiyenning yuragi Nyu-Jersilik 4 farzandning otasi, 16 yoshidan beri taxikardiyadan aziyat chekuvchi Artur Tomasga transplantatsiya qilinadi.
Stepiyenlar murojaat qilgan tashkilot operatsiyadan so‘ng, yaqin kishilarining yuragi transplantatsiya qilingan bemorlarlar va bunga rozilik bergan oilaning o‘zaro uchrashib turishiga ruxsat berardi. Shu sababli, Artur Tomas operatsiyadan so‘ng, Stepiyenlarning oilasiga minnatdorchilik maktubini yubordi. Shundan so‘ng, har ikki oila uzoq yillar muloqotda bo‘lib turishdi.
Bir necha oy avval, ya'ni to‘y sanasi ma'lum bo‘lgach, marhumning qizi Jeni turmushga chiqayotgani sababli, Arturdan otasi o‘rnida uni mehrob oldiga olib borishini so‘raydi. Artur ushbu sharafli vazifani bajarishga rozilik bildirdi va Nyu-Jersidan Pensilvaniyaga keldi.
Jenini mehrob oldiga, boshqa inson tanasida bo‘lsa ham otasining yuragi kuzatib bordi.
"Men, Jenining to‘yiga uning otasi vazifasini bajarish uchun kelganimdan baxtiyorman. Agar kerak bo‘lsa, shu yergacha piyoda kelgan bo‘lardim”, deydi minnatdorlik ohangida Artur Tomas.