Bugun, 4 aprel kuni Iqtisodiyot vazirligida "Qishloq xo‘jaligi mahsulotlarini qayta ishlash bo‘yicha olib borilayotgan islohotlar va istiqboldagi vazifalar”ga bag‘ishlangan ommaviy axborot vositalari xodimlari uchun matbuot brifingi o‘tkazildi.
O‘zbekiston Respublikasi Prezidentining 2016 yil 5 martdagi PQ-2505 sonli Qarori bilan tasdiqlangan "2016-2020 yillarda oziq-ovqat mahsulotlari xomashyo bazasini, meva-sabzavot va go‘sht-sut mahsulotlarini chuqur qayta ishlashni yanada rivojlantirish, ishlab chiqarish va eksport hajmlarini oshirish chora-tadbirlari to‘g‘risida”gi hamda 2017 yil 6 yanvardagi "2017-2018 yillarda meva-sabzavot mahsulotlarini saqlash va chuqur qayta ishlash quvvatlarini tashkil etishni rivojlantirish bo‘yicha qo‘shimcha chora-tadbirlar to‘g‘risida”gi dasturlar doirasida 740,1 million dollar qiymatga teng 434 ta loyiha amalga oshirilishi belgilangan.
Chunonchi, 163 ta loyiha, meva-sabzavot mahsulotlarini qayta ishlash quvvatlarini respublikaning meva-sabzavot va uzumchilikka ixtisoslashtirilgan tumanlarida, 39 ta go‘sht va sut mahsulotlarini qayta ishlash quvvatlarini xomashyoga yaqin hududlarda, 37 ta loyiha bo‘yicha qandolat, alkogolsiz ichimliklar va boshqa turdagi oziq-ovqat mahsulotlari ishlab chiqarish tashkil etiladi.
2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha harakatlar strategiyasining 3.3-bandi, ya'ni "Qishloq xo‘jaligini modernizatsiya qilish va jadal rivojlantirish”ga muvofiq, Yer va suv resurslaridan oqilona foydalanish maqsadida qishloq xo‘jaligi ekin maydonlarini maqbullashtiriladi.
Natijada 2017 yilda paxta ekin maydonlarini 49 ming gektarga va g‘alla maydonlarini 10 ming gektarga qisqartirilib, qisqartirilgan ekin maydonlariga boshqa qishloq xo‘jaligi ekinlarini, jumladan, 8,1 ming gektarga kartoshka, 27,2 ming gektarga sabzavot, 5,9 ming gektarga intensiv bog‘, 2,9 ming gektarga tokzor, 10,9 ming gektarga ozuqa ekinlari va 4 ming gektarga moyli ekinlar joylashtirish belgilangan.
Mazkur dasturni amalga oshirish meva-sabzavot mahsulotlarini qayta ishlash hajmining yillik 340 ming tonnaga, sovutgichli sig‘imlar hajmining 164,9 ming tonnaga, tara-qadoqlash mahsulotlari ishlab chiqarish hajmining 32,4 mln. donaga oshishiga olib keladi. Natijada, 2019 yilda respublikada ishlab chiqariladigan meva-sabzavot mahsulotlari hajmiga nisbatan qayta ishlashning ulushi 24 foizni tashkil etib, 4,6 mingta yangi ish o‘rni yaratiladi.
Natijada 2017-2021 yillarda qishloq xo‘jaligida oziq-ovqat mahsulotlari ashyosini ishlab chiqarish o‘rtacha 1,4 baravarga, jumladan, meva-sabzavot va uzum – 1,4 baravarga, go‘sht – 1,3 baravarga, sut – 1,5 baravarga ko‘payadi.