www.Nozim-Studio.com | Sevimli Portal

Tojikiston Afg‘onistonga bir oyda salkam 2 mln dollarlik elektr energiyasi sotdi

Admin — Tue, 19 Dec 2023 16:48:44 GMT

Tojikiston 2023-yilning noyabr oyida Afg‘onistonga 1,9 million dollarlik elektr energiyasi eksport qildi. Bu haqda mamlakat statistika boshqarmasiga tayanib, Asia-Plus xabar berdi.

Ma’lum qilinishicha, eksport hajmi o‘tgan oyga nisbatan 46 foizga ko‘pdir. Umuman olganda, 2023-yil boshidan buyon Tojikiston xorijga 107,7 million dollarga elektr energiyasi yetkazib bergan, bu 2022-yilning shu davriga nisbatan qariyb 5 foizga ko‘p.

Eslatib o‘tamiz, Tojikiston 2023-yil uchun elektr energiyasi yetkazib berish bo‘yicha faqat ikki davlat — Afg‘oniston va O‘zbekiston bilan shartnomalar tuzgan.

"Barki Tojik” ochiq aksiyadorlik jamiyati O‘zbekistonga elektr energiyasi faqat yozda eksport qilinishini, Afg‘onistonga yetkazib berish kuz-qish mavsumida, biroq "faqat infratuzilmani saqlab qolish uchun” kichik hajmlarda davom etishini bildirgan edi. Chunki yilning sovuq davrida respublikaning o‘zida ham elektr energiyasi keskin tanqisligi kuzatilmoqda.

O‘z navbatida, sentyabr oyining so‘nggi o‘n kunligidan boshlab Tojikiston qishloqlari aholisi elektr energiyasini juda cheklangan miqdorda — kuniga 5-6 soatdan olgan.

Statistika agentligi maʼlumotlariga ko‘ra, joriy yilning 11 oyi davomida respublikada qariyb 19,9 milliard kilovatt/soat elektr energiyasi ishlab chiqarilgan, bu 2022-yilning shu davriga nisbatan 3,4 foizga ko‘pdir. Joriy yilda elektr energiyasining 95 foizdan ortig‘i gidroelektrostansiyalarda, qolgan qismi esa issiqlik va quyosh elektr stansiyalarida ishlab chiqarildi.

Ukraina armiyasining qish uchun rejasi bor, rus qo‘shinlari jiddiy zarba oladi — AP

Admin — Tue, 19 Dec 2023 16:44:08 GMT

Ukraina Qurolli kuchlari qishda rus harbiylariga qarshi qaqshatqish urush olib borishni rejalashtirgan. Bu haqda Associated Press xabar berdi.

Xabarga ko‘ra, qo‘shinlarning muvaffaqiyat erishishiga byurokratiya to‘sqinlik qilmoqda. Ukraina armiyasi ba’zi hududlarni qisman ruslarga berishga majbur bo‘lishi mumkin, ammo rus harbiylari bunday "yutuqlar” natijasida katta yo‘qotishlarga duch keladi. Zaporojye yo‘nalishidagi janglarda qatnashgan Ukraina Qurolli kuchlari harbiysi Konstantin Denisov dron operatorlarini tayyorlashdagi kechikishlar haqida gapirdi. Xususan, u davlat idoralari zarur hujjatlarni rasmiylashtirishi uchun 75 nafar harbiy 7 oy kutishiga to‘g‘ri kelganini ma’lum qildi.

"Biz vaqtimizni behuda o‘tkazdik”, — deydi harbiy.

Harbiy qismlar komandirlari ham xuddi shunday pozitsiyada, jangovar topshiriqlarni bajarish kadrlar yetishmasligi va dronlarni taʼmirlashdagi kechikishlar tufayli to‘xtab qolmoqda.

Ukraina Qurolli kuchlarida qish uchun "reja” bor

Mudofaa vaziri Rustem Umerovning aytishicha, Ukraina jangovar harakatlarning keyingi bosqichiga o‘tish uchun yetarlicha qo‘shin va qurolga ega.

"Biz qodirmiz va xalqimizni himoya qila olamiz va buni amalga oshiramiz... Bizning rejamiz bor va unga ergashamiz”, — dedi mudofaa vaziri.

Ukraina Qurolli kuchlari, shuningdek, qish uchun "reja” allaqachon shakllantirilganini aytdi. Baxmut yo‘nalishida jang qilayotgan piyodalar brigadalaridan birining qo‘mondoni hozir asosiysi armiyani boy bermaslik ekanini bildirdi. Ukrainaliklarning yangi maqsadi bor — imkon qadar ko‘proq harbiylar hayotini saqlab qolish.

"Biz aniq gapirishimiz kerak. Bu qishda Donetsk yoki Baxmutni ozod qilishning iloji yo‘q, chunki ular (rus harbiylari — tahr.) juda ko‘p”, — dedi harbiy.

Rossiya qo‘shinlarini jiddiy zarba kutmoqda

G‘arbdagi ayrim tahlilchilar Ukraina ozod qilingan ayrim hududlarini Rossiyaga berishi mumkinligini taxmin qilmoqda. Biroq armiya ruslarni juda katta tovon to‘lashga majbur qiladi. Ruslar bu yerlarni katta yo‘qotishlar evaziga tortib olishlari mumkin.

"Agar Rossiya oldinga siljishda davom etsa, ehtimol, u kichik hududiy yutuqlarga erishadi, lekin katta yo‘qotishlarga duchor bo‘ladi”, — deydi Londondagi Xalqaro strategik tadqiqotlar institutining katta ilmiy xodimi Ben Barri.

Qashqadaryoda 7-sinf qiz unashtirilayotgani aytildi

Admin — Tue, 19 Dec 2023 16:43:45 GMT

Qashqadaryo viloyatida 2009-yilda tug‘ilgan, 7-sinf o‘quvchisi unashtirilayotgani haqida video tarqaldi. Bolalar ombudsmani holat bo‘yicha o‘rganish olib bordi.

Aniqlanishicha, holat Qashqadaryo viloyatining Ko‘kdala tumanida bo‘lib, mas’ullar tomonidan joyiga borib o‘rganish o‘tkazilganda, qizchaning ota-onasi videodagi holat aslida farzandining tug‘ilgan kuni munosabati bilan o‘tkazilgan marosim ekani to‘g‘risida tushuntirish berdi.

D.K.ning ota-onasi ayolni turmushga chiqishga majburlash uchun jinoiy javobgarlik mavjud ekanligi to‘g‘risida ogohlantirildi. Shuningdek, D.K.ning ota-onasi o‘z tushuntirishida videodagi holat to‘y yoki unashtiruv marosimi emasligi va qizini erta turmushga berish niyati yo‘qligi, unga ta’lim berish va shifokor bo‘lib yetishishi niyatida ekanligini ma’lum qildi.

Shu bilan birga, respublikaning bu hududida qizlarning unashtiruv marosimini erta o‘tkazish urf-odatlari qisman bo‘lsa-da, saqlanib kelayotganini inobatga olib, mazkur holat yuzasidan bolalar ombudsmani o‘z nazoratini davom ettiradi. Jumladan, bu oilada bolaning jismonan va ma’nan sog‘lom muhitda parvarish qilinishi, uning ta’lim olish huquqi hamda kelgusida o‘z hayoti bilan bog‘liq qarorlarni qabul qilish huquqi ta’minlanishi kuzatib boriladi.

Bolalar ombudsmani qizlarni erta turmushga berish holatlariga mutlaqo murosasiz bo‘lib, shunday fikrda bo‘lgan ota-onalarni nikoh yoshi to‘g‘risidagi qonunchilikni yoki nikoh tuzish tartibini buzish uchun qonunan javobgarlik belgilangani haqida ogohlantirdi.

Bugun O‘zbekistonning ba’zi joylarida qor yog‘ishi mumkin

Admin — Fri, 08 Dec 2023 14:24:50 GMT

Bugun, 8 dekabr kuni O‘zbekistonning ba’zi joylarida qor yog‘ishi mumkin. Bu haqda "O‘zgidromet” xabar berdi.

Prognozga ko‘ra, bugun kunduzi Buxoro, Navoiy, Qashqadaryo viloyatlarida va kunning ikkinchi yarmida Toshkent, Samarqand, Jizzax, Sirdaryo viloyatlarida yomg‘ir yog‘adi, ayrim joylarda u qorga aylanishi mumkin.

Qoraqalpog‘iston Respublikasida, Xorazm, Surxondaryo viloyatlarida va Farg‘ona vodiysi viloyatlarida yog‘ingarchilik kutilmaydi. Ba’zi joylarda tuman tushishi mumkin. Shamol 7-12 m/s tezlikda esadi, ba’zi joylarda 15-20 m/s gacha kuchayishi mumkin. Harorat 3-8 daraja iliq, shimolda -2/+3 daraja bo‘ladi.

Poytaxt Toshkentda kunning kunning ikkinchi yarmida yomg‘ir yog‘adi, kechga tomon qorga aylanishi mumkin. Ertalab tuman tushishi mumkin. Shamol 5-10 m/s tezlikda esadi, 12-15 m/s gacha kuchayishi mumkin. Harorat 3-5 daraja iliq bo‘ladi.

Respublikaning tog‘li hududlarida ba’zi joylarda yog‘ingarchilik (yomg‘ir, qor) bo‘ladi. Ba’zi joylarda tuman tushishi mumkin. Shamol 7-12 m/s tezlikda esadi, ba’zi joylarda 15-20 m/s gacha kuchayishi mumkin. Harorat 3-8 daraja iliq bo‘ladi.

Endi bir sutka 25 soatni tashkil etishi kutilmoqda

Admin — Fri, 08 Dec 2023 14:23:33 GMT

Myunxen Texnika Universiteti mutaxassislari Yer sayyorasining aylanishi sekinlashishga moyilligini aniqlashdi. Shu sababli, hozirda 24 soat bo‘lgan Yer kunini 25 soatga uzaytirish mumkin.

Yerdagi bir kun 24 soat yoki 86 400 soniyani tashkil qiladi va kunning aniq uzunligi kichik, ammo o‘zgaruvchan tebranishlarga bog‘liq. Ushbu nozik farqlarni tushunish kundalik hayotga bevosita ta’sir qilmasligi mumkin. Ammo bu yuqori aniqlikdagi iqlim modellarini yaratuvchi olimlar uchun muhim.

Zilzilalar, vulqon otilishi va hatto yer yadrosidagi suyuq metalning harakati natijasida yuzaga keladigan nozik siljishlar kabi hodisalarning ta’siri bu davrda kichik o‘zgarishlarga olib keladi.

Millisekundlarda o‘lchanadigan bu kichik tebranishlar oldindan aytib bo‘lmaydigan bo‘lsa-da, ular olimlar uchun muhim ma’lumot beradi. Germaniyaning Myunxen Texnika Universiteti professori Ulrix Shrayber kabi olimlar Yerning aylanishidagi tebranishlar nafaqat astronomiya, balki aniq iqlim modellari va El Nino kabi hodisalarni yaxshiroq tushunish uchun ham muhim ekanligini ta’kidlamoqda.

Hisob-kitoblarga ko‘ra, taxminan 200 million yildan keyin Yerda bir kun 25 soat davom etadi. Myunxen Texnika Universiteti olimlari bu jarayon bugungi kunda ham davom etayotganini va, masalan, 200 million yil avval Yerda bir sutkaning uzunligi 23 soatni tashkil etganini qayd etishdi. O‘sha paytda sayyoramizda dinozavrlar yashagan.

Yangi tadqiqotda Shrayber va uning hamkasblari Vettzell geodeziya observatoriyasida (Germaniya) o‘rnatilgan lazerli halqali giroskopdan foydalanganlar. Ushbu qurilma taxminan 6 metr chuqurlikda ko‘milgan muhrlangan kameraga joylashtiriladi va bu tashqi omillarning ta’sirini bartaraf qiladi, faqat Yerning aylanishidagi o‘zgarishlarning ta’sirini ta’minlaydi.

Giroskop turli yo‘nalishlarda harakatlanadigan ikkita lazer nurlari bilan jihozlangan. Sayyora tebranganda, lazer nurlaridan biri biroz qisqaroq masofani bosib o‘tadi. Jamoa hisob-kitoblarni amalga oshirdi va bir necha hafta davom etadigan davrlarda Yerning aylanishi 6 millisekundgacha o‘zgarib turishini aniqladi. Kelgusi oylarda olimlar aniqroq ma’lumotlarni olish uchun sozlashni yaxshilashni rejalashtirmoqda.

Olimlarning bildirishicha, 1,4 milliard yil avval Yerda bir sutkaning davomiyligi 18 soatu 41 daqiqa bo‘lgan. O‘lchovlar maxsus germetik maydonda, 6 metr chuqurlikda yer ostiga o‘rnatilgan aylana lazer yordamida amalga oshiriladi. Bunday sharoitda tashqi omillarning ta’siri minimallashtiriladi. Mutaxassislarning ta’kidlashicha, ob-havo sharoiti va iqlim o‘zgarishi qisman ushbu ko‘rsatkich bilan bog‘liq.

Elatib o‘tamiz, avvalroq Quyoshda Yerdan 60 barobar katta teshik paydo bo‘lganini xabar qilgan edik.

Baydenning o‘g‘liga qarshi yangi ayblovlar qo‘yildi

Admin — Fri, 08 Dec 2023 14:21:53 GMT

AQSH Prezidenti Jo Baydenning o‘g‘li Xanter Bayden soliq to‘lashdan bo‘yin tovlaganlikda ayblanmoqda. Bu haqda Kaliforniya markaziy okrug sudiga taqdim etilgan ayblov xulosasida aytiladi.

Xabar qilinishicha, sudlanuvchi 2016 yildan 2019 yilgacha bo‘lgan davrda 1,4 million dollardan ortiq federal soliqlarni to‘lashdan bo‘yin tovlaganlikda, shuningdek, soliq deklaratsiyasini noto‘g‘ri taqdim etganlikda ayblanmoqda.

OAV xabarlariga ko‘ra, unga 17 yilgacha qamoq jazosi berilishi mumkin.

Maxsus prokuror Devid Vayssning ma’lum qilishicha, Xanter Bayden soliq to‘lash o‘rniga millionlab dollarlarni ekstravagant (umumiy qabul qilingan urf-odatlarga zid – tahr.) turmush tarziga sarflagan.

Ayblanuvchi 2016 yilda bir million dollarga yaqin, 2017 yilda 1,4 million dollar, 2018 yilda 1,8 million dollar va 2019 yilda esa 600 ming dollar sarflagan.

2020 yilning yanvaridan 15 oktyabriga qadar sudlanuvchi turli shaxsiy maqsadlarda foydalanilgan holda 1,2 million dollardan ortiq moliyaviy yordam olgan.

"Ayblanuvchi 2016 yildan 2020 yil 15 oktyabrgacha bu pullarni giyohvand moddalar, eskort xizmatlari, qiz do‘stlari, hashamatli mehmonxonalar, ko‘chmas mulk ijarasi, nodir avtomobillar, kiyim-kechak va boshqa shaxsiy buyumlarga, ya’ni soliqlardan tashqari hamma narsaga sarflagan”, deyiladi hujjatda.

Shunungdek, Xanter Bayden, avvalroq, qurol bilan bog‘liq uchta jinoyatda – o‘qotar qurol sotib olayotganda yolg‘on gapirish, litsenziyalangan dilerga yolg‘on ma’lumot berish va giyohvandlarga o‘qotar qurol saqlashni taqiqlovchi qonunni buzishda ayblangan edi.

London Belarusga qarshi sanksiyalarni kengaytirdi

Admin — Fri, 08 Dec 2023 14:18:06 GMT

Buyuk Britaniya Belarusga qarshi sanksiyalar ro‘yxatini 17 ta pozitsiyaga kengaytirdi, jumladan, respublika Oliy sudi a’zolari Valentina Kulik va Igor Lyubovitskiy hamda prokurorlar ro‘yxatdan joy oldi. Bu haqda Buyuk Britaniya Tashqi ishlar vazirligi xabarida aytiladi.

Shuningdek, Minsk shahar sudi sudyalari Svetlana Bondarenko, Pyotr Orlov, Valentina Zenkevich va Sergey Xripachga, Gomel viloyat sudi sudyasi Nikolay Dolyaga nisbatan ham mamlakatga kirishni taqiqlash va aktivlarni muzlatishni nazarda tutuvchi cheklovlar kiritildi. Minsk viloyat sudi sudyalari Sergey Yepixov va Vyacheslav Tuleiko va Minskning Leninskiy tumani sudyasi Marina Zapasnik ham sanksiyadan quruq qolmagan.

Bundan tashqari, prokurorlar Sergey Girgel, Mixail Kovalev, Tatyana Grakun, Roman Bizyuk, Aleksandr Korol, Denis Mikushev va tergovchi Anton Kolyago ham Britaniya qora ro‘yxatiga kiritilgan. Londonga ko‘ra, yuqoridagi shaxslar Belarusda fuqarolik jamiyati va demokratik muxolifatni bostirish bilan shug‘ullangan.

Ulardan tashqari, yana sakkiz nafar suriyalik harbiy xizmatchi va mansabdor shaxslar Britaniya rasmiylarining sanksiyalar ro‘yxatiga kiritildi, ular orasida axborot vaziri Butros al-Xallyak, mehnat va ijtimoiy ishlar vaziri Luay al-Munajid, neft va mineral resurslar vaziri Firas Hasan Kaddur, Sanoat vaziri Abdul Qodir Johadar, Ichki savdo va iste’molchilar huquqlarini himoya qilish vaziri Muhsin Abdul Karim Ali va davlat vaziri Ahmad Bustaji ham bor.

Buyuk Britaniya hukumati, shuningdek, ayollarga nisbatan majburiy hijobni tatbiq etgani uchun mamlakat sud tizimi va xavfsizlik xizmati xodimlaridan besh nafar eronlikni ham sanksiyalar ro‘yxatiga kiritgan. Ro‘yxatdagi boshqa shaxslar orasida Gaiti Ichki ishlar vazirligining sobiq bosh direktori Fednel Monsheri va amerikalik Jozef Per Richard Dyuplan ham bor: ular 2018 yilda Port-o-Prens (Gaiti poytaxti) chekkasida o‘nlab odamlar o‘limiga sabab bo‘lgan qirg‘inda ishtirok etgan, deb hisoblanmoqda.

Bundan tashqari, London Kambodja, Tailand, Avstraliya, Xitoy va Myanmaning majburiy mehnat, odam savdosi va firibgarlik bilan shug‘ullangan ishbilarmonlari va amaldorlariga nisbatan cheklov choralarini qo‘llagan.

Ukraina O‘zbekistonning “Foton” zavodiga sanksiya kiritdi

Admin — Fri, 08 Dec 2023 14:14:57 GMT

Ukraina Prezidenti Vladimir Zelenskiy mamlakat Milliy xavfsizlik va mudofaa kengashi tavsiyasiga ko‘ra yangi sanksiyalarni tasdiqladi. "Qora ro‘yxat"ga kiritilganlar orasida O‘zbekistondagi "Foton” elektronika zavodi va uning direktori Marifxo‘ja Saidumarov ham bor. Ro‘yxat Prezident devoni saytida e’lon qilindi.

"Foton” va uning direktori bilan birga 180 nafar jismoniy va 184 ta yuridik shaxsga nisbatan sanksiya kiritilgan.

Ularga nisbatan aktivlarni bloklash, davlat mukofotlaridan mahrum qilish, litsenziyalarni bekor qilish, Ukraina hududida tranzit va savdo operatsiyalarini cheklash, xususiylashtirishni taqiqlash va boshqa cheklovchi choralar qo‘llaniladi va sanksiya 10 yil davom etadi.

Ma’lumot uchun, "Foton” zavodi 1942 yilda tashkil etilgan va bugungi kunda 68 ming kvadrat metrga yaqin ikkita ishlab chiqarish quvvatiga ega. 296 nafar mutaxassis mehnat qilayotgan korxonaning 85,6% aksiyalari davlatga tegishli.

"O‘zeltexsanoat” uyushmasi raisining birinchi o‘rinbosari Mansur Hoshimov rossiyalik investorlarga "Foton”ning 85,15 foiz aksiyalar paketini taklif qilib, O‘zbekistonda elektronika va elektrotexnika sohasida rivojlanish strategiyasini birgalikda ishlab chiqish, telekom-uskunalar, maishiy va sanoat robotlarini yaratishni yo‘lga qo‘yish bo‘yicha yangi ishlab chiqarishlarni tashkil etish taklifini ilgari surgandi.

Eslatib o‘tamiz, joriy yilning noyabr oyida ham Zelenskiy o‘zbekistonlik korxona va shaxslarga sanksiya kiritgani haqida ma’lum qilgan edik.

Messining uch bolasi yetim qolishi mumkin

Admin — Sun, 26 Nov 2023 14:33:21 GMT

Argentinalik futbol yulduzi Lionel Messi yaqin kunlarda turmush o‘rtog‘i Antonella Rokutsso bilan ajrashishi mumkin. Bu haqda "Oi Canadian” xabar berdi.

Nashrga ko‘ra, juftlik o‘rtasidagi o‘zaro munosabatlarga jiddiy darz ketgan, buning yuzaga chiqishi, dastlab joriy yilning 30 oktyabr kuni Messi "France football” nashri tomonidan topshiriladigan yilning eng yaxshi futbolchisi uchun sovrin – "Oltin to‘p”ni qabul qilib olayotganda ko‘zga tashlangan.

Ya’ni, futbolchi mukofotni olgach, oilasidan sahnaga chiqishni so‘ragan, ammo sahnaga faqat uning 3 o‘g‘li chiqqan. Antonella esa buni rad etgan. Shundan so‘ng Messi ijtimoiy tarmoqlardagi sahifasiga joylab boradigan oilaviy suratlarini sezilarli darajada kamaytirgan. Hatto, Instagram sahifasidagi o‘zining 5 kishilik oilasi aks etgan asosiy fotoni ham "Oltin to‘p” bilan tushgan rasmiga o‘zgartirib qo‘ygan.

15 yildan beri baxtli yashab kelayotgan juftlik dunyo mashhurlari orasida eng barqaror oilalardan biri sifatida tilga olinar edi. Shu bois bu mish-mishlar ko‘pchilikni hayratda qoldirmoqda. Ayrim nashrlar Messi va uning turmush o‘rtog‘i o‘rtasidagi munosabatlarga sovuqlik tushishiga jurnalist Sofiya Martines sababchi bo‘lgani haqida yozmoqda. Ammo bunga aynan nima sabab bo‘lgani ochiqlanmagan.

Ma’lumot uchun, Lionel Messi va Antonella Rokutsso 2009 yildan beri birga. Ular 2017 yilda rasman turmush qurgan bo‘lib, hozirda juftlikning 3 nafar o‘g‘li bor.

Toshkentda Jah Khalib’ning konsertida katta tartibsizlik chiqdi

Admin — Sun, 26 Nov 2023 14:29:12 GMT

Toshkentdagi Humo Arena saroyida 25-noyabr kuni mashhur xonanda Jah Khalibning konsert dasturi kuni tartibsizlik yuzaga keldi. Holat aks etgan videolar ijtimoiy tarmoqlarda tarqaldi.

Unda yuzlab odamlar konsertga kirish ilinjida Humo Arena saroyiga kirish qismida to‘plangani aks etgan. Odamlar chiptasi bo‘lsa ham konsertga kira olmayotgani aytilgan.

Milliy gvardiya Toshkent shahri bo‘yicha boshqarmasining ma’lum qilishicha, konsert dasturi kuni u yerda xizmat olib borayotgan Milliy gvardiya xodimlari tomonidan jamoat tartibini buzganlikda gumonlangan fuqarolar voqea joyidan xavfsiz hududga olib chiqilib, yuz berishi mumkin bo‘lgan salbiy holatlarning oldi olingan.

Tartibbuzarlikka doir holat yuzasidan surishtiruv va o‘rganish ishlari olib borilmoqda. Hozirda barcha fuqarolar voqea joyidan tarqatilgan. Tan jarohati olganlar yo‘q.

O‘zbekistonda shinalar uchun utilizatsiya to‘lovi undirilmoqchi

Admin — Sun, 26 Nov 2023 14:25:27 GMT

2024 yil 1 iyuldan avtomobil shinalari uchun utilizatsiya yig‘imini undirish taklif qilinmoqda. Bu haqda Iqtisodiyot va moliya vazirligining 2024-2026 yillarga mo‘ljallangan byudjetnomasida ma’lum qilingan.

Davlat byudjeti loyihasiga ko‘ra, 2024 yil 1 iyuldan avtomobil shinalarining har bir kilogrami uchun bazaviy hisoblash miqdorining (BHM) 0,3 foizi shaklida utilizatsiya yig‘imini undirish taklif qilinmoqda.

Aniqlik kiritilishicha, 4 ta shina (balon) yengil avtomobillar uchun o‘rtacha 6 kg dan 17 kg gacha bo‘lsa, ular uchun 6 200 so‘mdan 16 200 so‘mgacha yig‘im undiriladi. Mazkur yig‘imni xaridorlar emas balki, shina ishlab chiqaruvchilar yoki chetdan import qilayotganlar to‘laydi.

Shuningdek, yig‘im bitta yangi ishlab chiqarilgan shina uchun bir marta to‘lanadi, ya’ni har yili undirilmaydi. Qo‘shimcha qilinishicha, fuqarolar avtomobil sotib olib uning balonlarini istalgan o‘lchamdagi boshqa balonga almashtirmoqchi bo‘lganida ham utilizatsiya yig‘imi to‘lamaydi.

Utilizatsiya yig‘imidan tushgan pullar esa "Yashil makon” dasturlarini amalga oshirish uchun sarflanadi.

Biroq bu o‘zgarish O‘zbekiston bozorida shina narxlari sezilarli darajada ko‘tarilishiga olib kelmasligiga kafolat berib bo‘lmaydi. Chunki utilizatsiya yig‘imini undirilgan tadbirkor katta ehtimol bilan to‘lagan pulini xaridorning cho‘ntagidan qaytarib ola boshlaydi.

Namanganda Kia Bongo'ning gaz balloni portladi

Admin — Sun, 26 Nov 2023 14:20:33 GMT

Namangan viloyatidagi gaz quyish shoxobchalaridan birida Kia Bongo'ning gaz balloni portladi. Bu haqda viloyat Favqulodda vaziyatlar boshqarmasi axborot xizmati xabar berdi.

Ma’lum qilinishicha, bugun, 26 noyabr kuni Namangan viloyati To‘raqo‘rg‘on tumani "Xo‘jand” MFYda joylashgan "Metan” AGQSHda gaz to‘ldirish vaqtida Kia Bongo rusumli avtomobilga qo‘shimcha o‘rnatilgan propan suyultirilgan gaz balloni portlagan.

Viloyat FVBga ko‘ra, mazkur hodisa oqibatida tan jarohat olish holatlari va yong‘in sodir bo‘lmagan. Hozirda holat yuzasidan surishtiruv ishlari olib borilmoqda.

Eslatib o‘tamiz, avvalroq, Qashqadaryo viloyatining Muborak tumani hududidan o‘tuvchi "Qarshi-Buxoro” yo‘lida yo‘lovchilar bilan harakatlanib ketayotgan Isuzu avtobusining gaz balloni portlagani haqida xabar bergan edik. Viloyat Sog‘liqni saqlash boshqarmasi ma’lumotiga ko‘ra, avtobusning gaz balloni portlashi oqibatida 24 nafar yo‘lovchi jabrlangan.

Tunda Moskvaga ommaviy dron hujumi uyushtirildi

Admin — Sun, 26 Nov 2023 14:14:45 GMT

Rossiya havo hujumidan mudofaa tizimlari Moskva shahri tomon uchurilgan Ukraina Qurolli Kuchlariga qarashli uchuvchisiz samolyotni urib tushirdi. Bu haqda shahar meri Sergey Sobyanin o‘zining Telegram-kanalida ma’lum qildi.

Uning so‘zlariga ko‘ra, 26 noyabrga o‘tar kechasi poytaxt tomon ommaviy dron hujumi uyushtirilgan. Hujum paytida hech qanday vayronalar va qurbonlar bo‘lmagan.

"Bugun tunda ommaviy dron hujumiga urinish bo‘ldi. Havo hujumidan mudofaa kuchlari Naro-Fominsk hududida va Odinsovo shahar okrugida Moskva tomon uchayotgan dronlarni urib tushirdi. Havo hujumidan mudofaa tizimlari ham Bryansk, Tula va Kaluga viloyatlarida bir nechta uchuvchisiz uchoqlarni tutib, yo‘q qilishga muvaffaq bo‘ldi”, deb yozgan Sobyanin.

Shuningdek, Rossiya Mudofaa vazirligi Moskva, Tula, Kaluga va Bryansk viloyatlari hududida to‘qqizta Ukraina Qurolli Kuchlariga qarashli uchuvchisiz samolyoti yo‘q qilingani haqida xabar bergan.

Isroil G‘azo shimoliga qaytishga uringan falastinliklarga o‘t ochdi – OAV

Admin — Sat, 25 Nov 2023 03:35:10 GMT

Isroil armiyasi ertalabdan gumanitar pauza boshlangan G‘azo sektorining janubidan shimolga qaytishga urinayotgan falastinliklarga qarata o‘t ochdi. Bu haqda "Anadolu” xabar berdi.

Guvohlarning so‘zlariga ko‘ra, Isroil armiyasi eksklav janubidan G‘azo shahri va shimoliy hududlarga qaytishga urinayotgan falastinliklarni nishonga olgan.

Sog‘liqni saqlash manbalariga ko‘ra, Isroil harbiylari tomonidan uyushtirilgan otishma oqibatida bir kishi halok bo‘lgan. Bundan tashqari, ko‘p sonli falastinliklar (aksariyati oyog‘idan) yaralangan.

Yaradorlar Deyr al-Balah shahridagi "Al-Aqso shahidlari” shifoxonasiga olib ketilgan.

Eslatib o‘tamiz, bugun, 24 noyabr kuni ertalab mahalliy vaqt bilan ertalab soat 7:00 da HAMAS va Isroil o‘rtasida tuzilgan to‘rt kunlik gumanitar pauza kuchga kirgandi. Gumanitar pauza G‘azo sektoridagi hujumlarni vaqtincha to‘xtatish, asirlarni almashish va bloklangan eksklavga gumanitar yordam yetkazishni nazarda tutadi.

Mirziyoyev Aliyevni O‘zbekistonga taklif qildi

Admin — Sat, 25 Nov 2023 03:31:14 GMT

24 noyabr kuni O‘zbekiston Respublikasi Prezidenti Shavkat Mirziyoyev Baku shahriga amaliy tashrifi doirasida Ozarbayjon Respublikasi Prezidenti Ilhom Aliyev bilan muzokara o‘tkazdi. Bu haqda Prezident matbuot xizmati xabar berdi.

Ma’lum qilinishicha, uchrashuv avvalida Ilhom Aliyev O‘zbekiston rahbariga BMTning Markaziy Osiyo iqtisodiyotlari uchun maxsus dasturi (SPEKA) birinchi sammitini qo‘llab-quvvatlagani va unda shaxsan ishtirok etayotgani uchun minnatdorlik bildirgan.

O‘z navbatida Mirziyoyev ham Ozarbayjon Prezidentini SPEKAda muvaffaqiyatli raislik qilayotgani bilan tabriklagan.

Muzokara davomida O‘zbekiston-Ozarbayjon do‘stlik va strategik sheriklik munosabatlarini yanada mustahkamlash masalalari muhokama qilingan, shu jumladan oliy darajada erishilgan kelishuvlar ijrosi ko‘rib chiqilgan. Shuningdek, tizim va samarali muloqotlar tufayli ikki davlat munosabatlari sifat jihatidan yangi darajaga ko‘tarilgani, amaliy mazmun bilan boyigani qayd etilgan.

Davlat rahbarlari o‘zaro manfaatli hamkorlikning yangi yo‘nalishlari yuzasidan ham fikr almashgan. Kimyo, energetika, zargarlik, mashinasozlik, qurilish va boshqa yo‘nalishlarda istiqbolli loyihalarni ilgari surish masalalari muhokama qilingan. Madaniy-gumanitar almashinuvni yanada kengaytirish muhimligi qayd etilgan.

Uchrashuv yakunida Mirziyoyev ozarbayjonlik mavqedoshini o‘zi uchun qulay vaqtda rasmiy tashrif bilan O‘zbekistonga borishga taklif qilgan.

Ukraina qariyb 5 milliard dollarlik raketa sotib olmoqchi

Admin — Sat, 25 Nov 2023 03:29:00 GMT

Ukraina 2024 yilda raketa qurollari va o‘q-dorilarini sotib olishga qariyb 4,85 milliard dollar sarflashni rejalashtirmoqda. Bu haqda mamlakat Mudofaa vazirligi matbuot xizmati xabar berdi.

"2024 yilga mo‘ljallangan mudofaa byudjetining ustuvor yo‘nalishlaridan biri bu raketalar va o‘q-dorilardir. Bu sohaga 2024 yilga mo‘ljallangan mablag‘dan 175 milliard grivna (Ukraina Milliy bankining joriy kursi bo‘yicha taxminan 4,85 milliard dollar) sarflanadi. Harbiy texnika uchun – taxminan 80 mlrd grivna (taxminan 2,2 mlrd dollar) ajratiladi”, deyiladi xabarda.

Mudofaa vazirligining qo‘shimcha qilishicha, birinchi navbatda qurol-yarog‘ va jihozlar sotib olishga, shuningdek, Ukraina ishlab chiqaruvchilaridan shartnoma bo‘yicha ta’mirlash ishlariga e’tibor qaratiladi. 2024 yilda ushbu maqsadlar uchun ajratiladigan mablag‘lar hisobidan ularga 190 milliard grivnadan ortiq (taxminan 5,2 milliard dollar) pul ajratilishi rejalashtirilgan.

Bosh vazir Denis Shmigal Ukrainaning Oliy Rada tomonidan tasdiqlangan 2024 yilgi byudjetida xarajatlarning deyarli yarmi harbiy ehtiyojlar va xavfsizlikka yo‘naltirilishini ma’lum qilgan. Hujjatga ko‘ra, Ukrainaning tashqi qarzlari 41 milliard dollarni tashkil qilishi kerak.

Shundan so‘ng Ukraina Prezidenti Vladimir Zelenskiy harbiy sanoat ehtiyojlariga mintaqaviy byudjetlardan 96 milliard grivna (2,66 milliard dollar) o‘tkazish to‘g‘risidagi qonunni imzolagan. Shuningdek, 2024 yilda Ukraina Davlat yo‘l jamg‘armasining barcha mablag‘lari harbiy ehtiyojlarga yo‘naltiriladi. Ukraina Moliya vaziri Sergey Marchenkoning so‘zlariga ko‘ra, bu taxminan 94,7 milliard grivna (taxminan 2,6 milliard dollar)ni tashkil etadi.

Qirg‘izistonda qizamiq avj oldi

Admin — Sat, 25 Nov 2023 03:25:52 GMT

Qirg‘izistonda yil boshidan buyon 4 ming 484 kishida qizamiq kasalligi aniqlangan. Bu haqda Respublika immunoprofilaktika markaziga tayanib, "24.kg” xabar berdi.

Nashrga ko‘ra, qizamiq virusining faol tarqalishi Bishkek, Jalolobod va Chuy viloyatlarida kuzatilmoqda, bu yerda virusning yuqishi uyushgan guruhlardagi emlanmagan bolalar orasida sodir bo‘ladi. Boshqa hududlarda ham faol epidemiyalar mavjud.

Kasallikning oldini olish uchun qizamiq va qizilchaga qarshi vaksina bilan muntazam emlash doirasida qizamiq va qizilchaga qarshi takroriy emlash amalga oshirilmoqda. Qo‘shimcha emlash kampaniyasi Bishkek, O‘sh shaharlari, O‘sh va Chuy viloyatlarida ham davom etmoqda, ularda 472 ming 476 bola (78 foiz) vaksina oldi. Jalolobod viloyatida qizamiq kasalligi kuchayishi munosabati bilan uyushgan guruhlardagi bolalar o‘rtasida qo‘shimcha emlash ishlari boshlandi. Bundan tashqari, barcha yoshdagi aloqada bo‘lgan shaxslar 72 soat ichida shoshilinch ravishda emlanadi”, deyiladi xabarda.

Mutaxassislar qizamiq asoratlari tufayli xavfli ekanligini eslatib, ota-onalarni farzandlarini himoya qilishga, emlashga chaqirmoqda.

Eslatib o‘tamiz, noyabr oyi o‘rtalarida Jahon sog‘liqni saqlash tashkiloti (JSST) xalqaro miqyosda emlash qamrovining kamayishi tufayli qizamiq bilan kasallanish va o‘lim holati ortib borayotganidan ogohlantirgandi.

Dollar kursi yangi cho‘qqisidan biroz tushdi

Admin — Sat, 25 Nov 2023 03:24:40 GMT

O‘zbekiston Respublikasi Markaziy banki xorijiy valyutalarning o‘zbek so‘miga nisbatan 27 noyabr kuni amalda bo‘ladigan qiymatini belgiladi.

Unga ko‘ra, dollarning rasmiy kursi 8,82 so‘mga tushdi va 12 296,16 so‘mni tashkil qildi.

Yevro kursi esa 34,23 so‘mga pastlab, 13 406,50 so‘m etib belgilandi.

Rossiya rublining kursi 1,33 so‘mga tushib, 138,26 so‘mni tashkil etdi.

Eslatib o‘tamiz, bugun, 24 noyabr kuni dollarning so‘mga nisbatan rasmiy qiymati ilk marta 12 300 so‘mdan oshgandi.

Surxondaryoda 3,8 balli zilzila yuz berdi

Admin — Fri, 24 Nov 2023 09:21:57 GMT

Bugun, 24 noyabr kuni O‘zbekiston hududida kun hisobidan beshinchi zilzila qayd etildi. Bu haqda FVV Seysmoprognostik monitoring Respublika markazi ma’lum qildi.

Unga ko‘ra, 24 noyabr kuni mahalliy vaqt bilan soat 16:38 da (Grinvich bo‘yicha 11:38 da) Surxondaryo viloyatining Qumqo‘rg‘on 3,8 balli zilzila yuz bergan. Zilzila koordinatalari 37,56 gradus shimoliy kenglik; 67,78 gradus sharqiy uzunlikka to‘g‘ri keladi.

Yer silkinishining chuqurligi 5 km, magnitudasi 3,8 ga teng. Zilzila epimarkazi Toshkentdan 428 km janubi-g‘arbda joylashgan.

Respublika hududia sezilish kuchi:

• Jarqo‘rg‘on tumanida 2 ball, 37 km.

Eslatib o‘tamiz, kecha, 23 noyabr kuni O‘zbekiston hududida 4 marta yer silkinishi kuzatildi. Jumladan, Surxondaryo viloyatining Qumqo‘rg‘on tumanida soat 04:28 da 3,2 balli, 14:08 da 3,5 balli, 14:36 da esa 3,9 balli, 16:28 da 3,3 balli zilzila qayd etildi.

Urushdan keyin ham Isroil G‘azoni boshqarishda davom etadi

Admin — Fri, 10 Nov 2023 10:56:14 GMT

Isroil bosh vaziri Binyamin Netanyaxu G‘azo sektorining kelajakdagi boshqaruvi haqida gapirdi. Bu haqda Ynet nashri xabar berdi.

Netanyaxuga ko‘ra, Falastinning HAMAS harakati "yo‘q qilinganidan so‘ng” Isroil G‘azo sektorida xavfsizlik nazoratini tashkil qiladi.

"HAMAS yo‘q qilinganidan so‘ng G‘azodan hech qanday tahdid bo‘lmasligini taʼminlash uchun G‘azo sektorida Isroil xavfsizlik nazorati, jumladan, to‘liq demilitarizatsiya o‘rnatiladi”, — dedi u.

Shuningdek, Isroil bosh vaziri G‘azo tashqi kuchlar nazoratiga berilmasligini qo‘shimcha qildi.

"Urushdan keyin ham Isroil G‘azoni boshqarishda davom etadi. Biz hech qanday xalqaro tashkilotga ishonmaymiz”, — dedi u.

Ma’lumot uchun, Isroilning 7-oktyabrdan buyon G‘azoga bergan zarbalari oqibatida halok bo‘lganlar soni 11 078 kishiga yetdi, 27 490 kishi jarohat oldi. Halok bo‘lganlarning 4 506 nafari bolalardir.

“Saturn halqalari 2025-yilga kelib yo‘qoladi” — olimlar

Admin — Tue, 07 Nov 2023 16:29:59 GMT

NASA olimlari Saturn halqalarini 18 oydan so‘ng kuzatish imkoni yo‘qligini, chunki sayyor egilishi o‘zgarishini ma’lum qildi. Bu haqda Daily Mail xabar berdi.

Saturn halqalari 70-140 ming kilometrga cho‘zilib, ularning qalinligi 10 metrdan oshmaydi. Orbitasining egilishi tufayli Saturn Quyosh tomon bir oz tebranadi. Bu har 13,7-15,7 yil Yerdagi kuzatuvchilar halqalarni yon tomondan yaxshi ko‘rishini anglatadi. Hozirda ular Yerga nisbatan to‘qqiz daraja burchak ostida pastga egilgan.

Biroq 2024 yilga kelib, egilish 3,7 darajaga tushadi. 2025-yilda esa Saturn Yerga yaqinlashadi va bu uning halqalarini deyarli ko‘rinmas holga keltiradi. Ammo Saturnning egilishi yana o‘zgarganda, halqalarni ko‘rish mumkin. Astronomlar sayyoraning janubiy qutbini, o‘n yarim yil davomida tadqiqot olib borib bo‘lmaydigan halqalarning pastki qismini ko‘rishlari mumkin. Uni 2032-yilda to‘liq kuzatib bo‘ladi.

Saturn — Quyosh tizimidagi ikkinchi eng katta sayyora. Uning radiusi Yernikidan qariyb to‘qqiz baravar katta, biroq u past zichlikka ega va Yerdan atigi 95 marta kattaroqdir.

Mo‘rt armaturalar haqida video tarqaldi

Admin — Tue, 07 Nov 2023 15:54:12 GMT

Ijtimoiy tarmoqlarda sifatsiz armatura bilan bog‘liq video tarqaldi. Qurilish va uy-joy kommunal xo‘jaligi vazirligi bunga munosabat bildirdi.

Vazirlik videodagi holat qachon va qayerda bo‘lgani noma’lumligini bildirib, agar ushbu holatning qaysidir qurilish ob’ektida sodir bo‘lgani yoki uning ishlab chiqaruvchisi haqida asosli ma’lumot bo‘lsa, Qurilish va uy-joy kommunal xo‘jaligi sohasida nazorat qilish inspeksiyasi tegishli chora ko‘rib, vaziyat haqida axborot berishga tayyorligini ma’lum qildi.

"Shu o‘rinda qurilish ob’ektlariga olib kelinayotgan materiallar inspeksiyaning maxsus laboratoriyasi tekshiruvidan o‘tkazilishi, ishlab chiqarish jarayonida ham laboratoriya tahlillar tegishli tashkilotlar tomonidan amalga oshirilishini ta’kidlash o‘rinli. Bugungi kunda qurilish va uy-joy kommunal xo‘jaligi sohasida nazorat qilish inspeksiyasi laboratoriyalarida 78 tadan 108 tagacha turdagi qurilish materiallarining sifat ko‘rsatkichi sinovdan o‘tkazilmoqda", deyiladi vazirlikning munosabatida.

Aytilishicha, 2023 yilning o‘tgan 9 oyi mobaynida qurilish ob’ektlarida qurilish materiallarining yuqorida aytilgan barcha ko‘rsatkichlari bo‘yicha namunalar tanlab olinib, sinov laboratoriya tekshiruvidan o‘tkazilgan.

Xususan, 28,8 mingdan ziyod sinov bayonnomalari rasmiylashtirilgan hamda 28,01 mingtasida ijobiy natijalarga erishilgan, qolgan 700 dan ziyod holat yuzasidan salbiy bayonnomalar rasmiylashtirilib, hududiy inspeksiyalar tomonidan shaharsozlik sub’ektlariga nisbatan ma’muriy jarimalar, taqdimnomalar hamda ushbu ob’ektda qo‘llangan sifatsiz mahsulotlarni ob’ektlarda buzdirish va to‘xtatish ishlari amalga oshirilgan.

G‘azo bolalar qabristoniga aylanmoqda – Guterrish

Admin — Tue, 07 Nov 2023 15:50:26 GMT

BMT Bosh kotibi Antoniu Guterrish Isroilning G‘azo sektoridagi harakatlarini yana bir bor keskin tanqid qildi va anklav aholisiga gumanitar yordam ko‘rsatish maqsadida zudlik bilan o‘t ochishni to‘xtatishni talab qildi. Bu haqda u kecha, 6 noyabr kuni Nyu-Yorkdagi BMT qarorgohida so‘zlagan nutqida so‘z ochdi.

Guterrishning aytishicha, Isroil insonparvarlik urushiga oid xalqaro qonunlarni ochiqdan-ochiq buzmoqda. Uning so‘zlariga ko‘ra, Isroilning HAMASga qarshi urushida tinch aholini himoya qilish asosiy maqsad bo‘lishi kerak.

"Isroil tinch aholini bombardimon qilishda va o‘ldirishda, shifoxonalar, qochqinlar lagerlari, masjidlar, cherkovlar va fuqarolik infratuzilmasini, jumladan, boshpanalarni vayron qilishda davom etmoqda. G‘azoda xavfsiz joy qolmadi. G‘azo bolalar qabristoniga aylanyapti. U yerda har kuni yuzlab qiz va o‘g‘il bolalar halok bo‘ladi yoki yaralanadi ", degan BMT Bosh kotibi.

Bosh kotibga ko‘ra, G‘azodagi "dahshatli tush” nafaqat insonparvarlik inqirozi, balki insoniyat sivilizatsiyasi inqirozidir. Shu bilan birga, Guterrish HAMAS tomonidan 7 oktyabrda sodir etilgan dahshatli terror aktlarini to‘liq qoralashini va G‘azoda garovga olinganlarni zudlik bilan, hech qanday shartsiz va xavfsiz ozod qilish talabini takrorlagan.

"Tinch aholini ataylab qiynoqlarga solish, o‘ldirish, jarohatlash va o‘g‘irlashni hech narsa oqlay olmaydi. Ochig‘ini aytsam: qurolli mojaroning hech bir tomoni xalqaro gumanitar huquqdan ustun emas", deydi BMT Bosh kotibi.

Ularning bayonotida aytilishicha, 7 oktyabrdan beri G‘azo sektorida o‘nlab yordam xodimlari, jumladan, BMTning Yaqin Sharqdagi falastinlik qochqinlar bo‘yicha agentligining 88 nafar xodimi halok bo‘lgan. Bu yagona mojaroda halok bo‘lgan BMT xodimlarining eng yuqori soni.

O‘z o‘rnida, Isroil Tashqi ishlar vaziri Eli Koen Guterreshning G‘azo bolalar qabristoniga aylanib borayotgani haqidagi bayonotiga javob qaytargan.

"Uyat, Antonio Guterrish! G‘azo sektorida 30 dan ortiq voyaga yetmaganlar, jumladan, to‘qqiz oylik chaqaloq, shuningdek, ota-onasi sovuqqonlik bilan o‘ldirilgan go‘daklar va bolalar o‘z xohishlariga qarshi qamoqda. G‘azo sektorida Isroil terrorchi tashkilotni yo‘q qilish uchun kurashyapti”, deb yozgan Koen X ijtimoiy tarmog‘ida.

Rivojlanayotgan mamlakatlar Xitoyga kamida 1,1 trillion dollar qarzdor

Admin — Tue, 07 Nov 2023 15:41:33 GMT

Rivojlanayotgan mamlakatlar xitoylik kreditorlardan kamida 1,1 trillion dollar qarzdor. Bu haqda Amerikaning AidData tadqiqot institutiga tayanib, CNN xabar berdi.

Hozirda Xitoyning rivojlanayotgan mamlakatlarga ajratgan kreditlarining 80 foizi moliyaviy qiyinchiliklarga duch kelgan davlatlarni qo‘llab-quvvatlashga qaratilgan.

Ko‘p yillar davomida Pekin o‘z moliyasini qashshoq mamlakatlardagi infratuzilmani moliyalashtirishga, jumladan Xitoy rahbari Si Szinpin o‘zining "Bir makon, bir yo‘l” tashabbusi orqali yo‘naltirdi, deyiladi xabarda.

Ushbu moliyalashtirish Lotin Amerikasidan Janubi-Sharqiy Osiyogacha bo‘lgan yo‘llar, aeroportlar, temir yo‘llar va elektr stansiyalariga saxovatli tarzda ajratildi va qarz oluvchi mamlakatlarning iqtisodiy o‘sishiga hissa qo‘shdi. Bu ko‘plab hukumatlarni Pekinga yaqinlashtirdi va Xitoyni dunyodagi eng yirik kreditorga aylantirdi, shuningdek, mas’uliyatsiz kredit berishda ayblovlarni qo‘zg‘atdi.

AidData tomonidan e’lon qilingan Xitoyning 165 mamlakatni yigirma yildan ortiq moliyalashtirish tahliliga ko‘ra, hozirda Xitoyning rivojlanayotgan mamlakatlarga rasmiy sektor kreditlarining 55 foizi qarzni uzish muddatiga kirdi.

Ushbu qarzlar yuqori foiz stavkalari, mahalliy valyuta muammolari va global o‘sishning sekinlashuvi kabi yangi va qiyin moliyaviy sharoitda to‘lanadi.

Ushbu kreditlarning aksariyati 2013-yildan boshlab "Bir makon, bir yo‘l” davrida berilgan va besh, olti yoki yetti yillik imtiyozli davr bo’lgan va keyin qarz oluvchilar to‘lashlari shart bo‘lmagan (pandemiya davrida) qo‘shimcha ikki yillik imtiyozga ega bo‘ldi, — deydi AidData bosh direktori va hisobot muallifi Bred Parks.

AidData ma’lumotlari Xitoy hukumati va davlat kreditorlarining 2000 va 2021-yillar oralig‘ida past va o‘rta daromadli mamlakatlardagi davlat va xususiy sektor qarz oluvchilari oldidagi 1,34 trillion dollar miqdoridagi kredit va grant majburiyatlarini kuzatuvchi ma’lumotlar bazasiga asoslanadi.

Tadqiqotchilar rivojlanayotgan mamlakatlar Xitoy kreditorlaridan kamida 1,1 trillion dollar va 2021-yilga kelib 1,5 trillion dollargacha qarzdor bo‘lganini aniqladi.

Vaziyat o‘zgarmoqda ... so‘nggi o‘n yil ichida Xitoy dunyodagi eng yirik rasmiy kreditor bo‘ldi va hozir Xitoy dunyodagi eng yirik rasmiy qarz yig‘uvchisi bo‘lishidagi o‘sha burilish nuqtasidamiz, — dedi Bred Parks.

Qirg‘izistonning birinchi xonimi Oygul Japarova prezident Sadir Japarov bilan qanday tanishganini aytib berdi

Admin — Mon, 06 Nov 2023 16:29:32 GMT

Qirg‘iz Respublikasi prezidenti Sadir Japarovning rafiqasi Oygul Japarova (Asanbayeva) turmush o‘rtog‘i bilan qanday tanishgani haqida so‘zlab berdi.

Oygul Japarovaning aytishicha, Sadir Japarov bilan 1990-yillarda tanishgan.

"Men 10-sinfni tugatib (u vaqtda 11-sinf yo‘q edi), oliygohga kirishga tayyorgarlik ko‘rayotgan vaqtim edi. Sadir bo‘lsa armiya xizmatini o‘tab kelib, Frunzedagi (hozirgi Bishkek shahri) jismoniy tarbiya institutidagi o‘qishini qayta davom ettiraman, deb yurgandi.

U do‘stlari bilan toqqa dam olgani kelgan ekan. Bizning sinfdosh qizlar ham sayohatga chiqmoqchi bo‘lib o‘sha joyga borib qoldik. Sadir bilan o‘sha joyda ko‘rishdik. Hozir Sadirning 5 sinfdosh do‘sti mening 5 sinfdosh dugonalarimga uylangan.

Sadir bilan ko‘rishgan onimizdan bir-birimizni yoqtirib qoldik. Bir ko‘rishda muhabbat deyishadi-ku, shunday holat bo‘lgan. Shu bilan bir-birimiz bilan ajrashmadik”, — dedi Oygul xonim.

Birinchi xonim Sadir Japarovning halolligi, liderligi va tamaki chekmasligini alohida qadrlaydi.

Oygul Japarova 1973-yil 14-noyabrda Issiqko‘l viloyati, Tup tumani, San-Tosh qishlog‘ida tug‘ilgan. Qirg‘iziston davlat universitetining pedagogika fakultetini tamomlagan. Baʼzi manbalarga ko‘ra, oilada besh nafar, boshqa manbalarda esa to‘rt nafar farzand borligi aytilgan.

AQSH Eron va “Hizbulloh”ni Isroil bo‘yicha ogohlantirdi

Admin — Mon, 06 Nov 2023 16:12:16 GMT

AQSH prezidenti maʼmuriyati Turkiya orqali Eron va Livandagi "Hizbulloh”ga ogohlantirish yubordi. Bu haqda amerikalik rasmiylarga tayanib, The New York Times xabar berdi.

Ogohlantirishga ko‘ra, agar Isroilga hujum qilinsa, AQSH harbiy aralashuvga tayyor. AQSH davlat kotibi Entoni Blinken Amerikaning ikkita samolyot tashuvchisi mintaqaga yuborilganiga qaramay, Eron bilan to‘qnashuvga intilmayotganini aytmoqda.

"Biz Eron bilan ziddiyatga borishga intilmayapmiz – biz buni aniq aytdik. Ammo xoh harbiy, xoh fuqarolik xodimlarimiz bo‘lsin, ularni himoya qilish uchun hamma narsani qilamiz”, — dedi Blinken.

3-noyabr "Hizbulloh” yetakchisi Hasan Nasrulloh Isroil va HAMAS o‘rtasida urush boshlanganidan beri birinchi marta ommaviy nutq so‘zladi. Uning so‘zlariga ko‘ra, guruh 8-oktyabr kuni Isroilga qarshi jangovar harakatlarga qo‘shilgan. Nasrulloh Isroil armiyasi Livanga qarshi urush boshlasa, bu Isroilning butun mavjudligidagi "eng katta xatosi” bo‘lishini qo‘shimcha qilgan.

Nasrullohning so‘zlariga ko‘ra, Isroilning shimoliy chegarasida voqealar rivojlanishining barcha ssenariylari” amalga oshishi mumkin, biroq u "Hizbulloh”ning urushga kirishi haqida aniq gapirmagan.

Ukrainada 2024-yil prezidentlik saylovlari bo‘lib o‘tadi

Admin — Mon, 06 Nov 2023 15:52:03 GMT

Ukraina prezidenti Vladimir Zelenskiy Rossiyani Falastinning HAMAS guruhiga homiylik qilishda aybladi. Bu haqda NBC News xabar berdi.

Zelenskiy Isroil va HAMAS o‘rtasidagi urush birdaniga ikkita mojaro uchun AQSHdan mablag‘ ajratishni talab qilishini aytdi. U shu tariqa Rossiyani ikkala urushda, jumladan, HAMASga homiylik qilishda ham rol o‘ynashda aybladi. Siyosatchi "butun dunyo Yaqin Sharqdagi urushni to‘xtatish uchun hamma narsani qilishi kerak”ligini ta’kidladi.

Bundan tashqari, Zelenskiy "bugun bo‘lsa ham, Isroilga borishga tayyorligini” bildirdi. U tashrifning ehtimoliy vaqti haqida gapirar ekan, quyidagilarni qo‘shimcha qildi:

"Buni aytish qiyin, chunki men urush kechayotgan mamlakatning prezidentiman va siz bizning jang maydonimizda vaziyat juda qizg‘in ekanini bilasiz”.

Shuningdek, Zelenskiy har qanday mumkin bo‘lgan tashrif Ukrainadagi "jang maydonida nima bo‘layotganiga” va Isroildagi mojaro zonasini haligacha tark eta olmagan ukrainaliklarning o‘z vatanlariga qaytish imkoniyatiga bog‘liq bo‘lishini taʼkidladi.

Zelenskiy HAMASga Rossiya homiylik qilayotganini aytdi

Admin — Mon, 06 Nov 2023 15:45:36 GMT

Ukraina prezidenti Vladimir Zelenskiy Rossiyani Falastinning HAMAS guruhiga homiylik qilishda aybladi. Bu haqda NBC News xabar berdi.

Bundan tashqari, Zelenskiy "bugun bo‘lsa ham, Isroilga borishga tayyorligini” bildirdi. U tashrifning ehtimoliy vaqti haqida gapirar ekan, quyidagilarni qo‘shimcha qildi:

"Buni aytish qiyin, chunki men urush kechayotgan mamlakatning prezidentiman va siz bizning jang maydonimizda vaziyat juda qizg‘in ekanini bilasiz”.

Rossiya Liviyada harbiy baza qurmoqchi, AQSH xavotirda — Bloomberg

Admin — Mon, 06 Nov 2023 04:14:23 GMT

Rossiya va Liviya rasmiylari Afrika davlati hududida Rossiya harbiy bazasini qurish bo‘yicha muzokaralar olib bormoqda. Bu haqda Bloomberg xabar berdi.

Anonim manbalarga ko‘ra, Rossiya prezidenti Vladimir Putin va mamlakat sharqini nazorat qilayotgan Liviya milliy armiyasi bosh qo‘mondoni Xalifa Xaftar o‘rtasidagi harbiy kelishuv ularning 2023-yil sentyabr oyi oxirida Moskvadagi uchrashuvidan ko‘p o‘tmay boshlangan.

Ushbu kelishuvning bir qismi sifatida Rossiya o‘z harbiy kemalarini, ehtimol, O‘rta Yer dengizi sohilidagi Tobruk portida doimiy ravishda joylashtirish huquqini olishi mumkin. Shuningdek, Rossiya hozirda "Vagner” qiruvchi samolyotlari joylashgan bir nechta havo bazalariga egalik qilishi kutilmoqda.

Shu bilan birga, Liviya Rossiya ta’minlay oladigan havo hujumidan mudofaa tizimlariga muhtoj. Bundan tashqari, rus harbiylari Xaftarga uchuvchilar va maxsus askarlarni tayyorlashda yordam berishi mumkin.

Rossiya Liviya portidan harbiy maqsadlarda foydalanishi uchun port infratuzilmasini modernizatsiya qilish zarur.

AQSHning Liviya bo‘yicha sobiq maxsus vakili Jonatan Vayner amerikalik rasmiylar Liviyada Rossiya harbiy ishtirokini kengaytirish mavzusiga "juda jiddiy” qarashini ta’kidladi.

"Rossiyani O‘rta Yer dengizidan uzoqda ushlab turish asosiy strategik maqsad edi — agar Rossiya u yerda portlarga ega chiqsa, bu unga butun Yevropa Ittifoqiga josuslik qilish imkoniyatini beradi”, — dedi Vayner.

Yerni magnit bo‘ronlari qoplashi kutilmoqda

Admin — Sun, 05 Nov 2023 17:25:23 GMT

Rossiya Fanlar akademiyasi 6-noyabr, dushanba kuni Yerni kuchli magnit bo‘ronlari qoplashini ma’lum qildi. Bu haqda "Komsomolskaya pravda” xabar berdi.

Magnit bo‘ronlari 15-noyabrgacha davom etishi prognoz qilinmoqda. Faollikning asosiy cho‘qqisi 9-noyabrga to‘g‘ri keladi, shundan so‘ng magnit bo‘roni 10-15-noyabr kunlari yana faollashadi.

Atmosfera bosimining o‘zgarishi tufayli odamlarda bosh og‘rig‘i, migren, umumiy salomatlikning yomonlashishi, uyquchanlik paydo bo‘lishi mumkin. Surunkali kasalliklar, ayniqsa, yurak-qon tomir va nevrologik kasallikka chalinganlar o‘ta sezgir bo‘ladi.

Magnit bo‘ronlari hatto o‘rta kuchga ega bo‘lsa ham inson salomatligiga salbiy ta’sir ko‘rsatadi

Bunday kunlarda organizmga yordam berish uchun kuniga kamida 7-8 soat uxlash maslahat berilgan. Ratsiondan yog‘li va achchiq ovqatlarni olib tashlab, kuniga kamida 2 litr suv ichish tavsiya qilinadi. Qahva miqdorini kamaytirib, o‘simliklardan tayyorlangan choy iste’mol qilish kerak.

Shuningdek, kontrast dush, ertalabki mashqlar, toza havoda yurish, yugurish magnit bo‘roni fonida salomatlikni yaxshilashga hissa qo‘shadi.