Yaponiyaning Shimizu Corp. qurilish kompaniyasi o‘ziga xos ekologik suv osti shahri — Ocean Spiral loyihasini taqdim etdi, deya xabar bermoqda "RIA Novosti”.Suv osti shahri besh mingga yaqin kishini sig‘dira oladi. Loyihaning taxminiy qiymati uch trillion yenga teng (25,3 milliard dollar). Shahar loyihasi uchta bo‘limdan iborat, ularning birinchisi 500 metr diametrli gumbaz bo‘lib, uning yuqori qismi suv ustiga chiqib turadi. Gumbaz markazida minora joylashib, unda 450 xonali mehmonxona, apartamentlar, ofis xonalari, shuningdek ilmiy tadqiqot markazi tashkil etiladi. Gumbazning pastki qismi 15 kilometrli spiral bilan tutashadi, spiral ikkinchi tomondan dengiz qa’ridagi manbalarni o‘rganish bo‘yicha tadqiqot markaziga borib taqaladi. Rejalarga muvofiq, suv osti shahridagi energiyaning bir qismi generatorlar tomonidan yuzadagi iliq suv va okean tubidagi sovuq suv haroratlari o‘rtasidagi farq hisobidan ishlab chiqariladi.