Yangi Zelandiyada 198 ta grind-delfin qirg‘oqqa otilib chiqdi, deya xabar bermoqda The New Zealand Herald. Nelson shahri yaqinida sayozlikka chiqib qolgan jonivorlarni Tabiatni muhofaza qilish departamenti xodimlari ko‘rib qolgan.Muassasa xodimlari so‘zlariga ko‘ra, grindlarni suvga qayta uloqtirish uchun 500 ga yaqin ko‘ngillilar kerak bo‘ladi. Hozirgacha 20 ta delfin nobud bo‘lgan. Kechasi jonivorlar yonida bo‘lish xavfli bo‘lgani sababli, qutqaruv ishlari 14-fevral kuni ertalab 8:00 (Toshkent vaqti bilan 14-fevral 00:00)da davom ettiriladi. Tabiatni muhofaza qilish departamenti delfinlarning yalpi ravishda sohilga chiqib qolishi sababini aniq ayta olmadi. Taxminlardan biriga ko‘ra, jonivorlar sayozlikda mo‘ljalni yaxshi ololmasligi tufayli yo‘ldan adashgan bo‘lishi mumkin. Yana bir versiyaga ko‘ra esa, delfinlar tasodifan sayozlikka chiqib qolgan birodarlaridan biriga yordam kelgan.