Sobiq prezident 2 oktyabr kuni og‘ir ahvolda shifoxonaga olib vafot etgan, biroq bu haqdagi xabar endi tarqatilyapti.
Slovakiyaning birinchi prezidenti Mixal Kovach o‘tgan yakshanba, 2 oktbyar kuni vafot etdi. Biroq 86 yoshli siyosatchining o‘limi haqidagi rasmiy axborot bugun, 6 oktyabr kuni ommaga e'lon qilindi.. Bu haqda "Izvestia.ru” nashri yozmoqda.
Ma'lumotlarga ko‘ra, Mixal Kovach 30 sentyabr kuni Bratislavadagi muqaddas Mixal shifoxonasiga o‘ta og‘ir ahvolda olib kelingan va zudlik bilan kardiologiya bo‘limi tarkibidagi jonlantirish bo‘limiga yotqizilgan. Oradan ko‘p o‘tmay uning ahvoli og‘irlashgan. Shundan so‘ng, shifokorlar uni sun'iy koma holatiga tushirib, sun'iy nafas olish apparatiga ulashgan. Biroq shifokorlarning harakatlari natija bermagan va Kovach 2 oktyabr kuni vafot etgan.
Aytish lozimki, bu Kovachning yurak kasalligi bilan bog‘liq ilk holat emas. Shu yilning o‘zida u ikki marta yurak xuruji bilan shoshilinch tarzda shifoxonaga yetkazilgandi. So‘nggi yillarda u nafaqat yurak xastaliklari, balki Parkinson kasalidan ham aziyat chekayotgan edi.
Kovach Chexoslovakiya Federatsiyasining bo‘linishidan so‘ng Slovakiya Respublikasining ilk prezidenti sifatida ish boshlagan edi. U 1993 yilning yanvarida davlat rahbari lavozimini egalladi. 1989 yilning 12 dekabridan 1991 yilning 17 mayiga qadar Slovakiya Respulikasi Moliya vaziri bo‘lib ishlagan. Mixal Kovach Chexovlovakiyaning bo‘linishida o‘zining ulkan hissasini qo‘shgan siyosatchi, dono inson edi.