Главная » 2023 » Iyul » 5 » Sirdaryoda 49 yoshli ayol bir buyragini ukasiga berdi

---

22:42 Sirdaryoda 49 yoshli ayol bir buyragini ukasiga berdi

Sirdaryo viloyati Guliston tumanida transplantologiya yordamida donor ayolning buyragi ukasiga ko‘chirib o‘tkazildi. Bu haqda viloyat Sog‘liqni saqlash boshqarmasi xabar qildi. Qayd etilishicha, Guliston tumanining "Ahillik” mahallasida yashovchi Akromjon Mamatqulovda (1976-yilda tug‘ilgan) o‘tkir buyrak yetishmovchiligining ilk alomatlari ko‘zga tashlangan. Unga Guliston tibbiyot klasterining nefrologiya va gemodializ bo‘limiga yo‘llanma berilgan, ammo bora-bora gemodializ muolajalari samara bermay qo‘ygan. Shu sabab uning opasi Gulbahor Muxtorova (1974-yilda tug‘ilgan) Akromjonga bir buyragini berishga qaror qilgan. Shifokorlar xulosasidan so‘ng buyrak transplantatsiyasi bilan bog‘liq yuqori texnologik jarrohlik  amaliyoti o‘tkaziladi. Ushbu amaliyotni Guliston tibbiyot klasterida V.Vahidov nomidagi respublika ixtisoslashtirilgan xirurgiya ilmiy-amaliy tibbiyot markazi xirurglari sirdaryolik xirurglar hamrohligida muvaffaqiyatli o‘tkazgan.  Ayni vaqtda operatsiya ishtirokchilarining salomatligi yaxshi. Ular o‘z uyida shifokorlar nazorati ostida davo muolajalarini olmoqda. "Rosti, jondek jigaringni kundan-kunga so‘lib borishini ko‘rgach, na ko‘zingga uyqu keladi, na bir qultum suv tomog‘ingdan o‘tadi. Ko‘p ham o‘ylab o‘tirmadim, ukam, uning guldek farzandlari ko‘z o‘ngimdan o‘tavergach, bir buyragimni berishga qaror qildim. Ko‘rib turganingizdek, ukajonim sog‘-salomat. Opa uchun har narsadan ko‘ra, jigarining salomatligi muhimroq. Buning uchun shifokorlarga rahmat. Ular yordami sabab, men ukamga, ukam salomatlikka erishdi”, — deydi Gulbahor Muxtorova. Ta’kidlanishicha, xarajatlar Davlat tibbiy sug‘urtasi jamg‘armasi hisobidan qoplab berilgan.

1 2 3 4 5 Категория: Har-Hil | Просмотров:118 | Добавил: moderator | Теги: yangilik | Рейтинг: 0.0/0

Всего комментариев: 0