Швейцариянинг «Португал» клуби ярим ҳимоячиси 28 ёшли Рикардо Феррейра 50 йилга дисквалификация қилинди, дея хабар бермоқда Sports.ru. Жазо муддати 2064 йил 5 июнида тугайди, ўша вақтда Феррейра 78 ёшда бўлади.
Тўртинчи Швейцария лигаси доирасидаги «Португал»—«Ворб» ўйинида Феррейра жамоаси 0:1 ҳисобида ютқазгач, ўйин сўнгида ярим ҳимоячи ҳакамнинг юзига қарата тўп тепган. Арбитр ўйинчига қизил карточка кўрсатиб, майдонни тарк этаётганида ҳам Феррейра уни қувиб етиб, ҳақоратлай бошлаган ва бошига бутилкадан сув қуйиб юборган.
Шундан сўнг Швейцария футбол федерацияси ўйинчини бутун умрга футболдан четлатишга қарор қилди. Бироқ футболчиларнинг жазоланиш муддатини белгиловчи компьютер дастурига дисквалификациянинг якунланиш муддати ҳам киритилиши зарур бўлгани туфайли 2064 йил танланди, бу вақтда Феррейра футбол жамоатчилигига ҳеч қандай хавф сола олмайди.