Jo‘rabek Ro‘zmetov ssenariyi asosida, rejissyor Jahongir Ahmedov tomonidan «Islomxo‘ja» - Xiva xonligi bosh vazirining sirli fojiasi haqidagi badiiy-publisistik filmini suratga olish ishlariga tayyorgarlik boshlangan. Ayni kunlarda filmda rol o‘ynashi mumkin bo‘lgan aktyorlar jamoasi ham saralab olinmoqda. Islomxo‘ja obrazini taniqli aktyor Ulug‘bek Qodirov ijro etishi kutilmoqda. Bu haqda «O‘zbekkino» matbuot xizmati ma'lum qildi. Saralanayotgan aktyorlar qatorida Alisher Uzoqovni,Karim Mirxodiyevni,Xoshim Arslonovni,Azamat Axrorovni ko‘rish mumkin. Film ijodiy guruhi Rossiyaning Sankt-Peterburg shahrida xizmat safarida bo‘lib, buyuk ajdodimizning Rossiya bilan bog‘liq faoliyatini o‘rganib qaytgan. Sankt-Peterburg shahrida tanlangan makon va liboslar asosida film uchun tayyorlangan eskizlar ham muhokama etilgan. Ushbu filmni joriy yil «Ezgu-film» kinostudiyasida suratga olish rejalashtirilgan.Islomxo‘ja – ushbu yangi badiiy-publisistik film XX asr boshlarida nafaqat Xorazm muzofoti balki, butun Markaziy Osiyo hududi, hatto Chor Russiyasining amaldorlari orasida yuksak nufuzga ega bo‘lgan Xiva xonligining Bosh vaziri Islomxo‘janing hayoti va mehnat faoliyati haqida hikoya qiladi. O‘z davrining taraqqiyparvar, halqparvar davlat va jamoat arboblaridan biri bo‘lgan Islomxo‘ja 17 yoshidan xonlikning savdo va sanoat markazlaridan biri hisoblanmish Xazorasp bekligiga xokimlik qilgan, 26 yoshida Xiva xonligining Bosh vaziri etib tayinlangan. Valiaxd Asfandiyor to‘raning hukmronligi davrida Islomxo‘ja xonlikning barcha muhim va ma'suliyatli vazifalarini o‘z zimmasiga olib, ko‘plab inshoatlar qurdirgan. Qator sohalarda islohotlar olib borgan. Biroq, xonlikning eng yuqori amaldori, buyuk islohotchi Islomxo‘ja sirli ravishda o‘ldirilib, hatto qotillikni fosh etish uchun boshlangan tergov harakatlari bosdi-bosdi qilingan.
|