AQShning Guantanamo qamoqxonasida saqlanayotgan besh nafar mahbus Qozog‘istonga ko‘chirildi, deb xabar bermoqda Reuters. Har biri 10 yildan ko‘proq umrini qamoqda o‘tkazgan mahbuslarning uch nafari Yaman, ikki nafari Tunis fuqarolari ekani qayd etilgan. "Al Qoida” terrorchilik guruhi bilan aloqasi borligi aytilgan mahbuslar o‘ta kam darajada xavf tug‘dirishi aytilgan. Qozog‘iston uzoq davom etgan muzokaralardan keyin ushbu mahbuslarni qabul qilishga rozi bo‘lgani ma’lum qilingan. Xabar berilishicha, hozirda Guantanamo qamoqxonasida 127 nafar mahbus qolgan bo‘lib, ularning yarmidan ko‘pi Yaman fuqarolaridir. Ular vatanlariga qaytarilsa ozodlikka chiqarib yuborilmasligiga kafolat yo‘qligi tufayli AQSh ularni berib yubormayapti. Guantanamo qamoqxonasini yopish istagini AQSh prezidenti Barak Obama 2008-yilda bildirgan. Biroq Kongress a’zolari mahbuslarning AQSh shtatlari hududida joylashgan qamoqxonalarga ko‘chirlishiga qarshi chiqqani tufayli Vashington bu borada boshqa mamlakatlarga murojaat qilgan. 2014-yilda 28 nafar mahbus Slovakiya, Gruziya, Afg‘oniston va Urugvay qamoqxonalariga ko‘chirilgani qayd etilgan.