Главная » 2023 » Aprel » 24 » Eshkak eshish bo‘yicha Olimpiada sovrindori bo‘lgan rossiyalik sportchi O‘zbekiston terma jamoasiga qo‘shilishi mumkin

---

22:48 Eshkak eshish bo‘yicha Olimpiada sovrindori bo‘lgan rossiyalik sportchi O‘zbekiston terma jamoasiga qo‘shilishi mumkin

Rossiyalik eshkak eshuvchi Anna Prakaten O‘zbekiston terma jamoasi safiga qo‘shilishni xohlamoqda. Bu haqda Rossiya Eshkak eshish sporti federatsiyasi prezidenti Aleksey Svirin ma’lum qildi, deya xabar qilmoqda "TASS”. Anna Prakaten 30 yoshda. U Rossiya terma jamoasi tarkibida 2021-yilgi Yevropa chempionati g‘olibi bo‘lgan. Shuningdek, akademik eshkak eshish bo‘yicha Tokio—2020 Olimpiya o‘yinlari kumush medalini qo‘lga kiritgan. Anna 2016-yilgacha Belarus sharafini himoya qilgan. "Anna Prakaten O‘zbekiston terma jamoasi safiga qo‘shilishni niyat qilmoqda. Albatta, uning ketishi jamoamiz uchun katta yo‘qotish bo‘ladi. Lekin har bir sportchi o‘z taqdirini o‘zi hal qilishi kerak. Hozir yuqori darajadagi sportchilarimiz qiyin kunlarni boshdan kechirmoqda, musobaqalardan chetlatilgan vaqtda motivatsiya topish juda qiyin. Anya qish-bahor mavsumida qisman mustaqil, qisman terma jamoa bilan shug‘ullandi. U faoliyatini yakunlash haqida ham o‘yladi, lekin xalqaro musobaqalarda ishtirok eta olish uchun O‘zbekiston sharafini himoya qilishga qaror qildi. Biz o‘tgan yili yaxshi aloqada bo‘lgan O‘zbekiston federatsiyasi avvalroq xalqaro maydonda ishtirok etish uchun fuqaroligini o‘zgartiradigan rossiyalik sportchilarni qabul qilishga tayyor ekanini ma’lum qilgandi. O‘ylashimcha, xalqaro federatsiyaga allaqachon murojaat qilingan va bu masala ko‘rib chiqilgan. Agar xalqaro federatsiya buni ma’qullasa, sportchining O‘zbekiston uchun kurash olib borishiga to‘sqinlik qilishdan foyda bo‘lmaydi. Bunday sportchilar uchun 24 oylik karantin mavjud, ammo Xalqaro eshkak eshish federatsiyasi ijroqo‘mi rossiyalik sportchilar hozirda qanday holatda ekaniga qarab uni qisqartirishi mumkin. Shuning uchun Prakaten Parijdagi yozgi Olimpiya o‘yinlarida O‘zbekiston nomidan ishtirok etishi mumkinligini inkor qilib bo‘lmaydi”, — dedi Svirin. Qayd etish kerak, ayni vaqtda Rossiya va Belarus sportchilari ko‘plab xalqaro musobaqalar qatori Olimpiada va unga saralash bosqichini o‘taydigan turnirlarda qatnasha olmayapti. Xalqaro Olimpiya qo‘mitasi Ukrainadagi harbiy harakatlar sabab mamlakat sportchilarini ko‘plab musobaqalarga qo‘ymayapti.

1 2 3 4 5 Категория: Har-Hil | Просмотров:230 | Добавил: moderator | Теги: yangilik | Рейтинг: 0.0/0

Всего комментариев: 0