Bahor va yoz oylari tabiat injiqliklariga boy bo‘lgani sabab oynalarni tez-tez tozalab turishga to‘g‘ri keladi. Aksariyat uy bekalarimiz tozalash jarayonida oynalar avvalgiday toza bo‘lmasligidan noliydilar. Quyida siz maxsus vositalarsiz oynalarni yaxshi tozalash sirlari va boshqa foydali maslahatlarni bilib olishingiz mumkin.
• Agar oynangiz tozalikdan yaraqlab turishini istasangiz, oynani yuvayotgan suvga ozroq kraxmal qo‘shing.
• Oynalar namlanib, qishda esa muzlab qolishining oldini olish uchun glitsirin yordamida artish kerak.
• Agar oyna muzlab qolsa, uni darhol tuz bilan arting. Muz erigach, quruq mato bilan artish tavsiya etiladi.
• Oynalarni piyoz yordamida artsangiz, ularga pashsha va chivinlar yaqinlasha olmaydi.
• Rang berilgan oynalarni suv va ozroq iste'mol sirkasi aralashmasida artib olishingiz mumkin.
• Bo‘r va tish yuvish kukuni qadimiy va ko‘p qo‘llanilgan oynani yaxshi tozalovchi vositalar hisoblanadi. Buning uchun 2-3 osh qoshiq kukun va 1 stakan suv aralashtiriladi, ushbu aralashmaga botirilgan mato bilan oyna tozalanadi. Artilgan oyna qurigandan keyin quruq va yumshoq mato yoki gazeta qog‘ozi bilan tozalab artiladi.
• Tozalab yuvilgan billur idishlarni ko‘k kraxmal (sinka) tekkizilgan yungli mato bilan artilsa, idishlar yangidek yorqirab qoladi.
• Shisha ko‘za va grafinlarning tubi yaxshi tozalanishini istasangiz, iliq suvga solingan bir necha xom tuxum po‘stining aralashmasini idishga solib, obdon silkiting. Shunda ingichka og‘izli idishlaringizning tubi yaxshi tozalanadi.