Главная » 2020 » Fevral » 14 » AQSh bosh prokurori Trampning tvitlari ishlashiga xalal berayotganidan arz qildi

---

21:21 AQSh bosh prokurori Trampning tvitlari ishlashiga xalal berayotganidan arz qildi

AQSh prezidenti Donald Trampning Twitter’dagi Adliya vazirligi haqidagi gaplari vazirlik ishiga to‘sqinlik qilmoqda. "RBK”ning xabar berishicha, bu haqda ABC News’ga bergan intervyusida AQSh adliya vaziri va bosh prokurori Uilyam Barr ma’lum qilgan. Prokuror bayonoti Trampning yolg‘on guvohlik berish va Rossiyaning 2016-yilgi AQSh prezidentlik saylovlariga aralashuvini tekshirishga to‘sqinlik qilishda ayblangan sobiq prezident maslahatchisi Rojer Stounning ishi bo‘yicha izohlariga taalluqlidir. Barrning so‘zlariga ko‘ra, Tramp undan hech qachon "bu masala bo‘yicha biror narsa qilishini” so‘ramagan, ammo uning vazirlik, idora xodimlari, ishni ko‘rib chiqayotgan sudyalar haqida bayonotlari, shu jumladan, Twitter’da bildirgan fikrlari "ishni bajarishni imkonsiz qilmoqda”. Prokurorning fikricha, "Adliya vazirligi shug‘ullanayotgan jinoiy ishlar haqida tvitlar yozishni bas qilish payti keldi”. Keyinchalik Oq uy matbuot kotibi Stefani Grisham Barr "Amerikaning har bir fuqarosi kabi o‘z fikrini oshkora aytishga haqli” ekanligini bildirgan. Uning so‘zlariga ko‘ra, Tramp "Amerika xalqining adolatsizlikka qarshi kurashida ijtimoiy tarmoqlardan samarali foydalanadi” va bosh prokurorga butunlay ishonadi. Rojer Stoun 2019-yil yanvarida hibsga olingan edi. Vashingtondagi federal sudning sud hay’ati uni Rossiyaning saylovlarga aralashishini tekshirayotgan kongressmenlarni yolg‘on gapirishda va guvohlardan birining ko‘rsatmalariga to‘sqinlik qilishda aybdor deb topgan. 11-fevral, seshanba kuni Stounga yetti yildan to‘qqiz yilgacha qamoq jazosiga hukm qilish so‘ralgan. Tramp o‘zining Twitter’ida bu tavsiyasini tanqid qilib, taklif qilingan hukmni "dahshatli va insofsiz” deb aytgan. Shundan so‘ng Adliya vazirligi ishni o‘z nazoratiga olgan va Stoun ishi bo‘yicha to‘rt nafar prokuror bu ish bilan shug‘ulanishdan voz kechgan.

1 2 3 4 5 Категория: Har-Hil | Просмотров:536 | Добавил: moderator | Теги: yangilik | Рейтинг: 0.0/0

Всего комментариев: 0