Главная » 2018 » Oktyabr » 23 » 13 marta sudlangan retsedivist kampir yana jazoga tortildi

---

20:01 13 marta sudlangan retsedivist kampir yana jazoga tortildi

Malika Nishonova (maqoladagi ism – shariflar o‘zgartirildi) uchun sudning qora kursisi begona emas. U naq 13 marta jinoyat sodir etib, javobgarlikka tortilgan. 1955 yil, 8 iyunda Farg‘ona viloyati, Qo‘qon shahrida tug‘ilgan, ma'lumoti o‘rta, oilali, 5 nafar farzandning onasi. Afsuski, M. Nishonova yana sud kursisidan joy oldi. Navbatdagi firibgarlik Muqaddam ko‘p marotaba sudlangan M. Nishonova 2018 yil 16 mayda takroran firibgarlik jinoyatiga qo‘l urdi. U jarqo‘rg‘onlik fuqaro – Bahrom Safarovga Toshkentdan olib kelgan tovarlari uchun Jarqo‘rg‘on tumani Davlat soliq inspeksiyasi xodimlari 2 000 000 so‘m jarima solishganini, ammo to‘lov uchun unda yetarli mablag‘ yo‘qligini aytadi. Ustasifarang firibgar B. Safarovning ishonchiga kirib, undan 2 000 000 so‘m undiradi. «Ustama haqi bilan qaytaraman», deya va'da bergan ayol bozor narxi 120 000 so‘mlik «Nokia 1200» rusumli uyali telefon apparatini ham so‘rab olib, yarim soatda qaytarishga shartlashadi. Shu bilan M. Nishonova qorasini ko‘rsatmaydi. U B. Safarovni 2 000 000 so‘mga chuv tushiradi. Avvaldan rejalashtirilgan Malika Nishonova sudda yolg‘on ko‘rsatma berish qanday oqibatlarga olib kelishini yaxshi bilgan. Shu bois, u galdagi ayblovni umuman inkor qilmadi va qilgan ishi avvaldan rejalashtirilgani haqida so‘zlab berdi: M. Nishonova: – Surxondaryo viloyatining Jarqo‘rg‘on, Sherobod va SHo‘rchi tumani bozorlarida oziq – ovqat mahsulotlarini sotaman. 2018 yil 16 may kuni Toshkentdan jami 400 kilogramm olma, pomidor va bodring keltirdim. Tovarni sotib, uydagi elektr energiyasidan qarzni to‘lamoqchi edim. Savdo bo‘ladimi-yo‘qmi, deb xayol qilib, kimdandir pul olib turishni reja qildim. Rosti, bu ishni aldov yo‘li bilan bajarmoqchi edim. M. Nishonova undan bir necha marotaba olma sotib olgan «Adham» ismli tanishiga yuzlanadi. «2 000 000 so‘m qarzga berib tur, tez fursatda pulingni 4 million qilib qaytaraman» deya tanishini ishontirgan ayol «Adham»ning uyiga yo‘l oladi. Malika Nishonova o‘tirgan «Damas» rusumli taksi avtomashinasida B. Safarov ham bor edi. M. Nishonova: – O‘zini «Baxtiyor Safarov» deb tanishtirgan erkakka nima sababdan Jarqo‘rg‘on tumaniga ketayotganimni aytib berdim. Unga ismimni «Ra'no» dedim. Qo‘qondan, Jarqo‘rg‘onga erkak va ayollar kiyim-kechagi, pleyer, tyuner va boshqa shu kabi tovarlarni sotish uchun olib kelganimni, soliq idorasi xodimlari jarimaga solgani uchun bir tanishimdan pul olib turish uchun ketayotganimni gapirib berdim. Soliq idorasiga 2 000 000 to‘lasam, turmush o‘rtog‘im va tovarlarni olib chiqib ketishim mumkinligini aytdim. «Damas»dagilar suhbatimizni eshitishdi. B. Safarov menga yordam berishini aytib, ustama haq evaziga 2 million so‘m berib turadigan bo‘ldi. B. Safarov pulni olib chiqqach, M. Nishonova garov tariqasida oddiy sariq metaldan yasalgan bo‘yin taqinchog‘i, bir dona bilakuzuk va bir juft zirakni berib, ular tilladan ishlanganiga ishontiradi. So‘ng taksiga o‘tirib, SHo‘rchi tumanidagi bozorga boradi. U yerda o‘ziga ayollar ro‘molini sotib olib, poytaxtga yo‘l oladi. Malika Nishonova B. Safarovdan olgan pullarni o‘z ehtiyojlariga sarflab yuborgan. Sudda qilgan ishidan qattiq pushaymonligini aytib, undirilgan zararni to‘liq qoplashga va'da bergan. B. Safarov garovda qoldirilgan taqinchoqlarni zargarlik do‘koniga olib borib tekshirtiradi. Taqinchoqlar oddiy metaldan ishlanganini bilgach, chuv tushganini bilib, ichki ishlar bo‘limiga murojaat qilgan. Hukm o‘qildi Sudlanuvchi Malika Nishonova JKning 168-moddasi, 3-qismi, «b» bandida nazarda tutilgan jinoyatni sodir etganlikda aybdor deb topildi va 5 yil muddatga ozodlikdan mahrum qilish jazosi tayinlandi. O‘zbekiston Respublikasi JKning 60-61-moddalariga asosan, jinoyat ishlari bo‘yicha Samarqand shahar sudining 2018 yil 5 apreldagi hukmi bilan tayinlangan jazolar mazkur hukm bilan tayinlangan jazoga qisman qo‘shilib, sudlanuvchi Malika Nishonovaga eng kam oylik ish haqining 160 baravari – 18 million 944 000 so‘m jarima va 5 yil 1 oy muddatga ozodlikdan mahrum qilish jazositayinlandi. Sudlanuvchi M. Nishonovadan da'vogar B. Safarov foydasiga 2 075 000 so‘m undirilishi belgilandi. O‘zbekiston Respublikasi Oliy sudi matbuot xizmati hamda jinoyat ishlari bo‘yicha Qiziriq tuman sudi raisi Baxtiyor Mamadaminov bilan hamkorlikda tayyorlandi

1 2 3 4 5 Категория: Har-Hil | Просмотров:1302 | Добавил: Admin | Теги: 13 marta sudlangan retsedivist kamp | Рейтинг: 0.0/0

Всего комментариев: 0